Link açıqlığı

Umerov: bizim azat etilüvimiz – Erdoğan ile Putina arasındaki añlaşmadır


Ahtem Çiygoz ve İlmi Umerov Ukraina prezidenti ile körüşüvleri esnasında, 2017 senesi oktâbr 27 künü

Qırımda apisten azat etilgen Qırımtatar Milliy Meclisi reisiniñ muavinleri İlmi Umerov ve Ahtem Çiygozğa prezidentler Vladimir Putin ve Recep Erdoğan arasındaki ihtimallı añlaşmalarnıñ şartlarını bildirmediler. Bunı Qırım.Aqiqatqa İlmi Umerov söyledi.

Tünevin Almaniyanıñ dpa agentligi, Türkiyeniñ Habertürk teleşirketine sıltap, Türkiye akimiyeti Çiygoz ve Umerovnıñ azat etilmesine qarşılıq olaraq Moskvağa casuslıq yapqanlarından şübheli olğan Rusiye vatandaşları Aleksandr Smirnov ve Yuriy Anisimovnı teslim etti, dep bildirdi.

Bu malümat resmen tasdiqlanmadı. Rusiye ve Türkiye taraflarından buña dair izaatlar berilmedi.

Oktâbrniñ 25-nde Rusiye akimiyeti, Çiygoz ve Umerovnı azat etip, Türkiyege teslim etti. Daa soñra olar Kyivge keldi.

Oktâbrniñ 25-nde Ukraina prezidenti Petro Poroşenko Çiygoz ve Umerovnıñ azat etilmesi içün ğayret köstergen Erdoğanğa teşekkürlerini bildirdi.

Umerovnen Çiygoznıñ azat etilmesinden berli Rusiyenñ mahküm etilgenlerni nasıl şartlarnen yibergeni belli degil edi.

Qırım advokatı Edem Semedlâyev, Rusiye prezidenti memuriyetine ariza yazıp, Umerovnıñ Qırımdan qaysı bir qarar esasında çıqarılğanını añlatmağa rica etti.

XS
SM
MD
LG