Türkiye akimiyeti, qırımtatar milliy areketi liderleri Ahtem Çiygoz ile İlmi Umerovnıñ azat etilmesine qarşılıq olaraq Moskvağa casuslıqta qabaatlanğan eki Rusiye vatandaşı – Aleksandr Smirnov ile Yuriy Anisimovnı teslim etti. Bunı noyabr 29 çarşenbe künü, Türkiyeniñ Habertürk teleşirketine sıltap, dpa agentligi bildirmekte.
Habertürk, mahkemeniñ vesiqalarına sıltap, Smirnovnen Anisimov 2016 senesi aprel ayında yaqalandı ve yaqın zamanğa qadar Türkiyede mahkemeden evelki nezaret altında buluna ediler, dep bildire.
Casuslar deye şübhe altına alınğan eki şahıs sahte vesiqalarnıñ yapılması ve öldürüvniñ azırlanmasında qabaatlandı. Yerli polis hadimleri 2015 senesinde İstanbulda çeçen dissidentlerinden biriniñ ölüminden soñ olarnıñ peşine tüştiler.
Habertürk, Qırımtatar Milliy Meclisi reisiniñ muavinleri Ahtem Çiygoz ile İlmi Umerovnıñ azat etilmesi ve Smirnovnen Anisimovnıñ Rusiyege berilmesi bir-birine bağlıdırlar, dep iddia ete.
Bu haber resmen tasdiqlanmadı. Rusiye ve Türkiye tarafından açıq menbalarda bu mevzuda izaatlar berilmedi.
Oktâbrniñ 25-nde Rusiye akimiyeti Qırımda mahküm etilgen Qırımtatar Milliy Meclisi reisi muavinleri Ahtem Çiygoz ve İlmi Umerovnı azat etip, Türkiyege teslim etti. Daa soñra Umerov ve Çiygoz Kyivge keldiler.
Oktâbrniñ 25-nde Ukraina prezidenti Petro Poroşenko Qırımda mahküm etilgen Çiygoz ve Umerovnıñ azat etilmesi içün ğayret köstergen Türkiye Cumhuriyeti prezidenti Recep Tayyip Erdoğanğa teşekkürlerini bildirdi.
Umerovnen Çiygoz azat etilgen vaqıttan berli olarnıñ Rusiye tarafından nasıl şartlarnen yiberilgeni belli degil edi.
Qırım advokatı Edem Semedlâyev, Rusiye prezidenti memuriyetine ariza yazıp, Umerovnıñ Qırımdan qaysı bir qarar esasında çıqarılğanını añlatmağa rica etti.
