Ukraina informatsion siyaset nazirligi, ealige Qurultaynıñ ne olğanını ve qırımtatar milliy areketi içün tarihiy emiyetini bildirmek içün Birinci Qurultaynıñ 100 yıllığına bağışlanğan mediakampaniyanı başlay.
Bunı noyabrniñ 30-nda ötkerilgen matbuat konferentsiyasında informatsion siyaset naziriniñ muavini Emine Ceppar söyledi.
Onıñ aytqanına köre, Qurultay, 20-nci asırnıñ başına köre, olduqça demokratik vaqia edi, çünki, misal içün, qadınlarğa saylanmaq imkânını berdi.
«O (Qurultay – QA) içtimaiy imtiyazlarnı lâğu etip, er keske saylamaq aqqını berdi. Ve aqiqaten yüksek siyasiy medeniyet ve teşkilâtnıñ temeli oldı», – dedi Emine Ceppar.
O, mediakampaniyanıñ, Kyivde endi körülmesi mümkün olğan bir qaç bord ve sitilayttan ibaret olğanını añlattı.
Teleradio yayınlar boyunca Milliy komitet Qurultay aqqında videorolikke içtimaiy reklama statusını berdi. Yani onı köstermek ricasınen Ukraina telekanallarına yollaycaqlar, dep qayd etti o.
Ondan ğayrı kampaniyanıñ çerçivesinde bir risale azırlandı. Nazirlik onı Qırım tarihçısı, Ukraina PEN-klubu azası Gülnara Bekirovanen birlikte işlep çıqtı. Risalede Qurultaynıñ baş vazifeleri, o nasıl meydanğa ketirildi, onıñ maqsadı ve qırımtatarlar içün neticeleri aqqında qısqadan ikâye etile.
Qırımtatar Milliy Qurultayı – milliy toplaşuv, qırımtatar halqınıñ yuqarı temsiliy vekâletli organıdır.
1917 senesi dekabr ayında Qırımtatar Halqı Qurultayı mavı tüslü milliy bayraq, Qırım hanlarınıñ altın tamğası şeklinde milliy gerb ve milliy gimnni qabul etti.
Dekabrniñ 6-nda Yuqarı Rada Birinci qırımtatar qurultayı münasebetinen tantanalı oturuşuv keçirecek.
