Qırım Muhtar Cumhuriyeti Prokuraturası, söñki üç ay içinde devletke hainlik etkenlerinde qabaatlanğan sabıq Aqyar şeer şurasınıñ deputatlarına qarşı 10 qabaatlav aktını mahkemege yollağanını bildire. Bunı noyabrniñ 30-nda prokuraturanıñ matbuat hizmeti bildirdi.
Nezaret organı, «Aqyar şeer şurasınıñ üç deputatına qarşı nevbetteki qabaatlav aktları mahkemege yollandı», dep izaat berdi.
«Cinaiy işlerniñ tahqiqatı esnasında, 2014 senesi mart ayında Qırım Muhtar Cumhuriyeti Aqyar şeer şurası deputatlarınıñ, Qırımnıñ işğaline qoltutqanları ve yardım etkenlerine dair red etilmez delliller elde etildi», – denile bildirüvde.
Prokuraturanıñ malümatına köre, deputatlar «qanunsız olaraq bir sıra qararlar aldı, Qırım Muhtar Cumhuriyeti Yuqarı Radasınıñ sözde «umumqırım referendumı» aqqında qararına qoltuttılar».
Sabıq deputatlar 12-den 15 yılğa qadar azatlıqtan marum etilüv şeklinde cezalana bileler.
Noyabrniñ 28-nde prokuratura, QMC Yuqarı Radasınıñ sabıq deputatlarına qarşı 59 qabaatlav aktınıñ mahkemelerge yollanğanını bildirdi. Olar devletke hainlik yptılar dep şüphe altında bulunalar.
Ukrainanıñ Baş prokuraturası, askeriy yeminni bozıp, Qırım Rusiye tarafından ilhaq etilgen soñ yarımadadan qıtağa qaytmağan 73 Ukraina arbiy hadimini devletke hainlik etkenlerinde qabaatlay.
Halqara teşkilâtları Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, oña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
