İşğal altındaki Qırımda noyabrniñ 23-nde tutulğan qırımtatar faalleri Kâzim Ametov, Asan Çapuh, Ruslan Trubaç ve Bekir Degermenciniñ apsinen bağlı olarnıñ imayesi azırlağan apellâtsiya şikâyeti baqılacaq künler kesildi.
Qırım.Aqiqatqa advokat Edem Semedlâyev haber etkenine köre, toplaşuvlar Kreml nezaretindeki Qırım Yuqarı mahkemesinde ötkerilecek eken: Bekir Degermenci ve Ruslan Trubaç boyunca – dekabrniñ 6-nda saat 10:00da, Kâzim Ametov ve Asan Çapuh boyunca – dekabrniñ 5-nde saat 14:00te.
«Biz er vaqıt ep yahşılıq olacağına ümüt etimiz ve iç olmağanda, ev apsine qarar berilmesini rica etecemiz», – dep ilâve etti Semerdlâyev.
Rusiye nezaretindeki Aqmescitniñ Kiyev rayon mahkemesi, qırımtatar faaalleriniñ evinde ötkerilgen nevbetteki tintüvler dalğasından soñ tutulğan Kâzim Ametov, Asan Çapuh, Ruslan Trubaç ve Bekir Degermencini 2018 senesi yanvarniñ 15-ne qadar apiste qaldırma qararı alğan edi.
İlhaq etilgen Aqmescitte noyabrniñ 23-nde kündüz yerli kafede üç qırımtatar faali tutulğan edi. Rusiye FSBsiniñ Qırım idaresi tutulğan faallerni Türkiye vatandaşından «büyük miqdarda para talap etüv»de qabaatlay.
Qırım işğalinden soñ yarımadada mustaqil jurnalistler, cemaat ve qırımtatar milliy areketiniñ faalleri, Meclis azaları ve «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilmege başladı.
