Rusiye Tış işleri nazirliginiñ yolbaşçısı Sergey Lavrov italyan «Libero» gazetasına bergen intervyusında, «Qırım Rusiye terkibinde qalacağı ve bu mesele bütünley qapalğanı» aqqında beyan ete. O, muhbirlerniñ «ilhaq etilgen Qırım qomşu Rusiyeniñ terkibinde qalacaqmı», degen sualine böyle cevap berdi.
«Söz, barışıq ve abadanlaşma oğruna añlı yolnu saylâğan Qırım sakinleriniñ serbest, ve demokratik iradesi aqqında ketkenini hatırlatmaq ister edim. 2014 senesi fevral ayında, Ukrainada devlet avdarması neticesinde ükümet başına keçken milliy-radikal elementler at oynatqan devirde, halq mefaatınıñ qorçanması içün, öz taqdiriniñ çezülüvini bu şekilde ayatqa keçirilmesi -yekâne ayatiy bir fursat olğan edi», – dey Lavrov.
2014 senesi martnıñ 16-nda Qırımnen Aqyar şeerinde dünyada tanılmağan referendum olıp keçti, onıñ neticelerine köre Rusiye Qırımnı öz terkibine kirsetti. Ukraina, Avropa Birligi, Amerika Birleşken Devletleri bu rey berüvni tanımadı. Martnıñ 18-nde Rusiye prezidenti Vladimir Pütin Qırımnı Rusiyege «qoşulğanı» aqqında ilân etti.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey.
