Litva ükümeti Ukrainağa aman-aman eki million eurolıq silâ ve qurşun bermege qarar berdi, dep bildire Litva mudafaa Nazirligi.
Ukrainağa NATO standartlarına keçilmesinden evel Litva Silâlı quvetleri qullanğan silâ berilecek.
Berilecek silânıñ esas qısmını yedi biñden ziyade Kalaşnikov avtomatı, eki millionğa yaqın qurşun ve cephane teşkil etmekte. Ondan ğayrı 80 yaqın pulemöt, mina topu ve tanksavar ve diger donatmalar berilecek.
«Mülkniñ berilmesi Ukrainağa mudafaa küçüni arttırması ve mustaqilligini temin etmesi içün ardı-sıra ve er taraflama yapılğan yardımnıñ bir qısmıdır», – dep bilidire Litva mudafaa Nazirligi nazir Raymundas Karoblisniñ sözlerini.
Mudafaa Nazirligi, Rusiyeniñ arbiy tecavuzı başlanğanından berli Litva, elinde olğan imkânlar ve uquqiy ceetten musaade etilgen usullarnen Ukrainanıñ mustaqilligi ve topraq bütünligine qoltutmağa faal areket etip kelgeni aqqında hatırlata.
Silânıñ teslim etilüvi ukrain tarafınen bazı ameliy meseleler boyunca kelişikenden soñ yaqın vaqıtta yapılacaq, denilmekte haberde.
İlk defa silânı Litva Ukraibnağa 2014 senesi bergen edi. Litva mudafaa naziri Karoblis, Litva ükümeti Ukrainağa öldürgici silâ bergeni ve imkânı olğanı qadar böyle yardımnı devam etecegini bildirgen edi.
