Rusiyedeki Tatarstanda tatar tiliniñ mecburiy ögrenilmesi lâğu etildi. Böyle qaideler Rusiye Tasil nazirligi tarafından işlep çıqılğan oquv planında bulunmaqtadır, dep bildire noyabrniñ 29-nda Aqiqat Radiosı.
Tatarstan prokurorı İldus Nafikovnıñ bildirgenine köre, bu cumhuriyette mektep talebeleri tilni göñülli olaraq, ana-babalarınıñ yazılı şeklindeki razılığı esasında aftada eñ çoq 2 saat qadar ögrenecekler. Buña beñzer qaideler bütün Rusiye territoriyasındaki cumhuriyetlerniñ devlet tillerine nisbeten qullanılacaqlar.
Tatarstan Anayasasına binaen, rus ve tatar tilleri, devlet tilleridir. Olar mekteplerde mecburiy şekilde ve musaviy kölemde ögretilmek kerekler. Rusiye qanunları ise tatar tiliniñ göñülli olaraq ögrenilmesini közde tuta. Noyabrniñ ortasında Tatarstan prezidenti Rustam Minnihanov, tatar tili cumhuriyetniñ bütün mektep talebeleri içün mecburiy qalacaq, amma onı aftada evelki altı saat yerine eki saat ögretecekler, dedi. Onıñ bildirgenine köre, bu şartlar Rusiye akimiyetinen uyğunlaştırıldı.
Ağustosnıñ soñunda Rusiye prezidenti Vladimir Putin, rusiye vatandaşlarına berilgen bölgeniñ yerli ve milliy tillerni göñülli olaraq ögrenmek ve rus tili boyunca programlarnı tolu kölemde keçmek aqqı bölgelerde nasıl temin etilgenini teşkermek vazifesini berdi.
Rusiye Prokuraturası, ülkeniñ cumhuriyetlerinde milliy tillerni yalıñız istekke köre oqutmaq mümkün olğanına dair qarar berdi. Daa evel rus tilinde laf etken balalarnıñ ana-babaları tatar tiliniñ rus tiline köre daa büyük kölemde ögretilgenini şikâyet ettiler. Analardan biri mahkemede Tatarstan rehberlerine qarşı dava açıp, kompensatsiyanıñ ödenmesini talap etti.
