AQŞnıñ Ukrainadaki elçisi Mari Yovanoviç, Rusiye tarafından Kerç boğazından köpürniñ qurulması Ukraina tarafından halqara bazarlarınen naqliyat alâqasınıñ amelge keçirilmesine keder ete, dey.
Bunı o, Kyivde Deñiz telükesizligi boyunca halqara konferentsiyasında çıqışta bulunaraq söyledi, dep bildire noyabrniñ 28-nde «İnterfaks-Ukraina».
«Rusiye tarafından Kerç köprüniñ qurulmasını devam etüv, Ukrainanıñ Azav deñizindeki limanlarına yüklerniñ ketirilmesini büyük ölçüde sıñırlay. Bu limanlar, Ukrainanıñ kömürü, madeni ve zahiresiniñ halqara bazarlarına alıp barğan yol boyunca taşılmaları içün müim qapılar olalar», – dep bildire Yovanoviçniñ sözlerini haber agentligi.
Kütleviy haber vastalarınıñ malümatına köre, ondan ğayrı Yovanoviç, Ukrainanıñ Qırım işğali neticesinde arbiy-deñiz flotunıñ 70%-nı ğayıp etkenini söyledi. Bunıñnen beraber o, Rusiye tarafından Ukrainanıñ Qara deñizdeki gaz ocaqlarınıñ qullanılğanını tenqit etti.
Rusiye prezidenti Vladimir Putin Kerç boğazından köpür qurmaq kerekligini Qırımnıñ ilhaqı artından, 2014 senesiniñ martında söyledi. Köpürni 2018 senesine qadar qurmaq ve 2019 senesiniñ yazında işletüv içün teslim etmege söz berdiler.
Ukraina tarafı Rusiye ile köpür quruv aqqında añlaşmadan 2014 senesinde Qırım Rusiye tarafından ilhaq etilgen soñ çıqtı.
Halqara teşkilâtları Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, oña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
