Kyivde noyabrniñ 28-nde qırımtatar klassik yazıcısı Yunus Qandımnıñ «Küreş meydanını ot basmaz…» kitabınıñ ukrain tiline tercimesi taqdim etildi. O, 1917 senesindeki qırımtatar milliy areketiniñ lideri Noman Çelebicihanğa (1885-1918) bağışlandı, dep bildire Qırım.Aqiqatnıñ muhbiri.
Taqdim merasiminde Ukraina halq deputatları, qırımtatar milliy areketiniñ liderleri Mustafa Cemilev ve Refat Çubarov, Ukraina informatsion siyaseti naziriniñ muavini Emine Ceppar iştirak ettiler.
Muhbirniñ malümatına köre, yaqın vaqıtta kitap serbest satıluvğa çıqarılacaq ve onı Ukrainanıñ tükânlar ağında satın almaq münkün olur.
Yunus Qandımnıñ kitabı qırımtatar tarihınıñ yetekçi erbaplarından biri, birinci kere demokratik usulnen saylanğan Tavriya müftisi, 1917 senesinde Muvaqqat Qırım musulman komitetiniñ ve 1917-1918 senelerinde Qırımtatar milliy akimiyetiniñ reisi, yazıcı, şair ve qırımtatar milliy gimnniñ muellifi Noman Çelebicihannıñ ayatı ve icadına bağışlana.
Neşirde büyük sayıda menbalar ve bir sıra maqalelerniñ talili esasında yazılğan Çelebicihannıñ ayatı ve faaliyetiniñ mahsus tetqiqatı yer almaqta. Tercime alim, «Ukrayins’ka initsiatyva» cemiyet teşkilâtı idaresiniñ reisi Yuriy Kosenko tarafınan yapıldı.
Qurultay-Meclis öz-özüni teşkil etüv sistemasınıñ terkibiy qısmı olğan Qırımtatar Milliy Meclisi 2016 senesi aprelniñ 26-nda Kremlniñ kontroli altında bulunğan Qırım Yuqarı mahkemesiniñ qararınen Rusiye toprağında ve ilhaq etilgen Qırımda yasaq etildi. Meclisniñ advokatları Rusiyeniñ Yuqarı mahkemesine appelâtsiya yolladı, lâkin 2016 senesi sentâbrniñ 29-nda o, red etildi.
2017 senesi aprelniñ 19-nda BMT Halqara mahkemesi Ukrainanıñ Rusiyege qarşı davası boyunca ara qararını çıqardı. Onıñ bir maddesi, Meclisniñ ğayrıdan meydanğa ketirilmesini talap ete.
