Qırımnıñ Rusiye tarafından ilhaqından zarar körgen işhanelerniñ Ukrainadan zararnıñ ödenmesini talap etmek aqqı yoq. Bunı halqara adliyecisi, Kyiv halqara munasebetleri institutınıñ ocası Anton Korineviç, Qırım.Aqiqat Radiosınıñ canlı yayında Krasnoperekopsk balıq iqtisadiyatı işhanesiniñ Ukrainağa qarşı açqan davasını izalar eken, söyledi.
«Qırım işhaneleriniñ Ukraina mahkemelerinden bir ümütleri bar dep tüşünmeyim. Bunıñ pek sade bir sebebi bar. Elbette, Qırım Ukraina toprağı sayıla, lâkin o, işğal etilgen. Demek, anda olıp keçkenler içün işğalci devlet cevapkâr. Rusiye balıq iqtisadiyatı işhanesini suvnen temin etip olmasa, bu, Ukrainanıñ problemi degil. Qırım Ukrainanıñ adliy ükmü altında qalsa, suvnı kimse kestirmeyceği bellidir», – dep qayd etti adliyeci.
Krasnoperekopsk rayonından bir işhane ilhaq etilgen yarımadağa suv berilmesiniñ toqtatıluvı neticesinde körgen zararı içün Kyivniñ iqtisadiy mahkemesinde dava açtı. Bunı Rusiyege tabi Qırım akimiyeti yanındaki halqara uquqı meseleleri boyunca mutehassıslar şurasında bildirdiler. Ondan ğayrı bu muessisede ayrı şahıslarğa qarşı qullanılğan sanktsiyalar ve umumen Qırımğa qarşı qabul etilgen sıñırlamalarnıñ qanunsızlığını isbatlamaq maqsadınen Avropa mahkemesine davalar azırlap başladılar.
