Ukraina prezidentiniñ Rusiye ilhaq etken Qırımdaki daimiy temsilciligi haber etkenine köre, bundan soñ Qırım sakinleri evliliklerini 24 saat içinde esas Ukrainanıñ Geniçesk ve Novaya Kahovka şeerlerinde resmiyleştirebileleler.
Bu aqta temsilcilikniñ Facebook saifesinde bildirilmekte.
«Qanuniy yolnen evliliklerini tez ve oñaytlı şekilde resmiyleştirmege istegen Ukrainanıñ vaqtınca işğal etilgen topraqlarında yaşağan Qırım sakinleriniñ diqqatine. Ukraina ükümetiniñ noyabrniñ 15-nde çıqqan 2017 № 802-р sanlı buyruğına binaen, «24 saat içinde evlilik» leyhası mucibi evlilikni qayd etüv hızmeti Herson vilâyetiniñ (vilâyet merkezinden ğayrı) Geniçesk ve Novaya Kahovka şeerlerinde berilmesi de temin etilsin», – dep haber etmekte temsilcilik.
Temsilcilikte qayd etilgenine köre, evlilikniñ resmiy qayd etilüvinen bağlı pilot leyhanıñ kenişletilmesi «problemni bütünley çezip olamay».
«İlâve olaraq işğal altında bulunğan topraqlarda yaşağan sakinlerniñ evliligini qısqartılğan yolnen qayd etüv mehanizminen RAGS rayon bölükleri oğraşmaqta», – denilmekte haberde.
Kreml nezaretindeki Qırımnıñ adliye nazirligi bergen malümatqa köre, noyabrniñ 7-11 arasında yarımadada 297 dane resmiy nikâh qayd etilgen. Nazirlik qayd etkenine köre, esasen «pişkin» yaştakiler evlenmekte. Evlengen erkeklerniñ yaşı ortalama - 37, qadınlarnıñ - 34 olğanı qayd etile.Hususan, evlengen çiftlerniñ yaşı 40, 45, 50 ve ondan da ziyadedir.
«24 saat içinde evlilik» – Ukraina Adliye nazirliginiñ pilot leyhası olaraq, bir aile meydanğa kelmesi içün, munasebetlerniñ yañı protsedurağa binaen resmiyleştirilmesinen bağlıdır.
