Ukraina Telükesizlik hizmeti (SBU), 2017 senesinde Aqyar şeer şurasınıñ 11 deputatına qarşı devlet hainligi zanı ile mahkemeden evelki tahqiqatnı başladı, dep bildire. Bunı muessiseniñ matbuat hizmeti bildirmekte.
«SBUnıñ hadimleri, 2010 senesinde Aqyar şeer şurasınıñ nevbetteki saylavlarında saylanğan 6-ncı çağırış deputatlarınıñ Ukraina Anayasası ve Ukrainanıñ qanunlarını bilerek bozğanlarını tayin etti», – denile bildirüvde.
SBU matbuat hizmeti, uquqqoruyıcı organları hadimleriniñ deputatlar tarafından Ukrainanıñ mustaqilligi, topraq bütünligi ve toqunılmazlığına ketirilgen zararnı vesiqalı şeklinde qayd etkeniniñ altını sızmaqta.
«Deputatlar Aqyarnıñ, Ukrainanıñ ayırılmaz qısmı olğanını bilip, onıñ «mustaqilligi ve şeer şurasınıñ «Aqyar şeeriniñ qanun çıqarıcı toplaşuvı» şeklinde ğayrıdan adlandırılması içün rey berdiler. Ondan ğayrı olar sözde «Qırım Cumhuriyeti»niñ meydanğa ketirilmesi ve onıñ Rusiyege qoşulması içün de rey berdiler», – dep izalaylar SBUda.
Al-azırda tahqiqatçı ve prokurorlar Qırım parlamentiniñ sabıq deputatlarına qarşı 59 qabaatlav aktı ile Aqyar Devlet şurasınıñ sabıq deputatlarına qarşı 7 qabaatlav aktını mahkemege yolladılar.
Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti. 2015 senesi oktâbrniñ 7-sinde Ukraina prezidenti Petro Poroşenko munasip qanunnı imzaladı. Halqara teşkilâtları Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, oña «tarihiy adaletniñ tiklenmesi», dey.
