AQŞ Devlet departamentiniñ Ukraina işleri boyunca mahsus vekili Kurt Volker, AQŞ Rusiye akimiyetiniñ, Qırım ilhaqı meselesi qapalı ve müzakere etilmemeli şeklindeki beyanatlarına razı degil, dedi.
Bunı o, POLITICO neşirine bergen intervyusında söyledi.
«Men Qırım meselesini ortağa qoyam ve rusiyeliler buña qarşı: «Biz Qırım aqqında laf etmek istemeymiz», deyler. Bizim buña razı olmağanımıznı qayd etmek pek müimdir», – dedi Volker.
Onıñ aytqanına köre, AQŞ «Rusiyeniñ ücümini ve Qırımnıñ ilhaqını qanuniy tanımay» ve Ukrainanıñ şarqında barış elde etilgen soñ yarımadanıñ ilhaqı meselesinde inkişaf ola bilecek.
Noyabrniñ başında Volker, Donbasstaki vaziyetiniñ ihtimallı al etilmesi Qırımnıñ Rusiye tarafından ilhaqını tanımama siyasetiniñ deñişmesine ketirmez, dedi.
Halqara teşkilâtları Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, oña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
