Rusiyede casuslıqta qabaatlanıp yaqalanğan jurnalist Roman Suşçenkoğa, cinayet işlegenini itiraf ettirmek içün psiologik tazyıq yapıla, dep bildire Mark Feygin.
«Keçken afta «Lefortovo»dan çıqqanımda imayem altında bulunğanğa: «Roman Vladimiroviç, yahşı tüşünmelisiñiz, 20 yılğa «keteceksizmi», yoqsa tahqiqat ile işbirligi yapacaqsızmı?» Buña ne demeli. Tahqiqat öz işini bitirmek üzre ve daa soñra «Şaroyko sheması» boyunca areket etmek maqsadınen qabaatnı itiraf ettirip, soñ vagonğa atılıp kirmek istey. Lâkin bizim işimizde bu olmaz», – dedi Feygin «Ukrinform» haber agentligine.
Twitterde Feygin, «Beyazrusiyede Şaroykoğa qarşı qullanılğan operativ shemanı Roman Suşçenko boyunca da ömürge keçirmek içün» özüniñ yılın soñuna qadar advokat statusından marum etile bilecegini yazdı.
Rusiye telükesizlik hadimleri açıq menbalarda buña dair izaat bermediler.
Noyabrniñ 27-nde Moskva şeer mahkemesi Suşçenkonıñ apiste bulunuv müddetini yanvarnıñ 30-na qadar uzattı.
Rusiye FSBsi, 2016 senesi sentâbrniñ 30-nda Moskvada «Ukrinform» haber agentliginiñ muhbiri Roman Suşçenkonı yaqalap, oña «maqsatkârlıqnen Rusiye silâlı quvetleri ve milliy gvardiyanıñ devlet sırını teşkil etken areketleri aqqında malümat toplağan» Ukraina keşfiyatınıñ hadimi olğanını isnat etti.
Jurnalistke qarşı cinaiy iş «casuslıq» maddesi boyunca açıldı. Oktâbr ayında Feygin, Suşçenko işi boyunca tahqiqatnıñ bitirilgenini bildirdi.
Jurnalist bütün qabaatlavlarnı red ete. Ukraina tarafı Suşçenkoğa qarşı qabaatlavlarnı esassız dey ve onı deral azat etilmesini talap ete.
