25 ve 45 yaşını toldurğan soñ, footresim yapıştırılması içün pasportını teslim etken Qırım sakinleri, memuriy sıñırdan mahsus ID-karta vastasınen keçirilecek. Bu aqta Qırım.Aqiqatmuhbirine Qırım Muhtar Cumhuriyetindeki Ukraina prezidentiniñ daimiy temsilcisiniñ birinci muavini İzet Gdanov bilidridi.
«Ukraina migratsion hızmeti seviyesinde qabul etilgen qararğa binaen, fotoresim yapıştırılması kerek olğanda Ukraina vatandaşına ID-karta berilecek. O berilgen vaqıtta Qırım sakinleri vaqtınca işğal etilgen topraqlarğa qaytabilmesi içün, programma bir anketa yazdırıp çıqaracaq», – dedi Gdanov.
Onıñ sözlerine köre, Qırım sakinleri keçersiz pasportnen beraber ID-karta alınması içün kerek olğan vesiqalarnı teslim etmeli.
Oktâbr ayında işğal altındaki Qırımnıñ memuriy sıñırından keçken yolcu sayısı keçken ayğa nisbeten 9,5 faizge azlaştı.
Qırım 2014 senesiniñ başında Rusiye tarafından ilhaq etilgeninden soñ Ukrainanıñ esas qısmınen yarımada arasında memuriy, lâkin aslında tam bir «sıñır» peyda oldı. Memuriy sıñırda «Kalançak», «Çongar» ve «Çaplınka» olmaq üzre, üç kiriş-çıqış kontrol noqtası çalışmaqta.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey.
