Link açıqlığı

QMC Prokuraturası devlet hainligi işi boyunca sabıq Qırım deputatına qarşı materiallarnı mahkemege yolladı


QMC Prokuraturası, devlet hainligi yapqanı içün sabıq Qırım Yuqarı Radasınıñ deputatına qarşı qabaatlav aktını mahkemege yolladı.

Cinaiy işniñ tahqiqatı esnasında 2014 senesiniñ martında Qırım Muhtar Cumhuriyetiniñ mezkür deputatınıñ, Qırımnıñ işğaline yardım etkeni ve qoltutqanına dair red etilmez delliler elde etildi. Bu cümleden onıñ bivasta iştiraki ile bir sıra qararlar qabul etilip, neticede qanunsız «Qırım Cumhuriyeti» devlet teşekküli meydanğa ketirildi», – denile prokuraturaıñ bildirüvinde.

Bildirüvge köre, qabaatlanğan şahıs 12 yıldan 15 yılğa qadar azatlıqtan marum etilüv şeklinde cezalana bile.

Bugünge qadar tahqiqatçı ve prokurorlar tarafından Qırım parlamentiniñ sabıq deputatlarına qarşı 59 qabaatlav aktı ve Aqyar Devlet şurasınıñ sabıq deputatlarına qarşı 7 qabaatlav aktı mahkemege yollanıldı.

Ukraina Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti. 2015 senesi oktâbrniñ 7-sinde Ukraina prezidenti Petro Poroşenko munasip qanunnı imzaladı. Halqara teşkilâtları Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, oña «tarihiy adaletniñ tiklenmesi», dey.

XS
SM
MD
LG