Link açıqlığı

Rusiye: aq-uquq qoruyıcıları ekstremizmge qarşı küreşüv merkezlerini yoq etmege talap eteler


«İnsan aqları oğruna» areketiniñ rehberi Lev Ponamaröv

Noyabrniñ 26-nda Moskvada, Umumrusiye insan aqlarınıñ qorçalavı oğruna qurultayında aq-uquq qoruyıcıları şimdiki alda olğan ekstremizmge qarşılıq kösterüv idarelerini yoq etmege talap etken qararnı qabul ettiler, dep bildire Azatlıq Radiosı.

Qurultay iştirakçileriniñ fikrine köre, muessise «büyük ölçüde terrorizm ve ekstremizmge qarşı kerçekten küreşmek yerine akimiyetniñ ideologik raqiplerni taqip ete». Ondan ğayrı aq-uquq qoruyıcıları «siyasiy ve ideologik maqsatlarına irişmek içün zorbalıq qullanmağan» teşkilâtlarnı ekstremistik olaraq ilân etüvniñ toqtatılmasını talap ettiler.

Bu cümleden şimdiki alda olğan «E» Merkezini yoq etmek teşebbüsi ile «İnsan aqları oğruna» areketiniñ rehberi Lev Ponamaröv çıqışta bulundı. O, terrorizm ve ekstremizge qarşı küreşüv bayraqları altında insan aqları ve ürriyetleriniñ sıñırlanması yapıla, dedi.

Ponamaröv, qurultay iştirakçilerine muracaatta bulunıp: «Telükesizlik muessiseleriniñ faaliyeti Rusiye vatandaşlarına qarşı doğrultılğan… Mahkeme şubesiniñ statistikasına köre, 2003 senesinden soñ anayasa qurumı ve telükesizlik esaslarına qarşı yapılğan cinayetler boyunca mahküm etilgenlerniñ sayısı 28 qat arttı. Cinayetçilerniñ sayısı 28 qat artqanına inanmaq olurmı? Elbette yoq!» – dedi.

«E» Merkezi olaraq da belli olğan Rusiye İçki işler nazirligi (İİN) yanındaki Ekstremizge qarşılıq kösterüv boyunca baş idare, İİN merkeziy idaresiniñ struktur alt şubesi olıp, ekstremistik faaliyetlerge qarşılıq kösterüv saalarında devlet siyasetini işlep çıqara ve ömürge keçire.

XS
SM
MD
LG