Rusiyeniñ kontroli altında bulunğan Qırım akimiyeti yanındaki halqara uquqı meseleleri boyunca mutehassıslar şurası 2018 senesinde mahkemelerde Qırımğa qarşı sanktsiyalar boyunca ilk davalarnı açmaq niyetindeler. Bunı, mutehassıslar şurasınıñ rehberine sıltap, «RİA Novosti Krım» haber agentligi bildire.
«Sanktsiyalar boyunca bir de-bir netice aqqında söylemek, şimdilik ertedir. İş yapıla ve bu yılda olmasa da, kelecek yılda biz bunı mıtlaqa yapacaqmız. Biz eki yönelişte çalışamız: birincisi – ayrı şahıslarğa qarşı sanktsiyalar. Bu yerde biz öyle bir şahısnı saylamaq isteymiz ki, oña qarşı qullanılğan sanktsiyalar iç şübhesiz esassız olmalı. Şimdilik bu iş devam ete», – dey o.
Ondan ğayrı mutehassıslar şurasınıñ adliyecileri umumen Qırımğa qarşı qabul etilgen sanktsiyalar boyunca mahkemede dava açmaq isteyler.
«Bu, büyük ölçüde siyasiy meseledir. Biz (Rusiyeniñ – QA) Tış işleri nazirligi ve (Rusiyeniñ – QA) Adliye nazirligi ile sıqı alâqada bulunıp çalışamız. İşniñ eñ murekkep yeri şu ki, dava çetelde, Lüksemburgdaki Avropa adliye mahkemesinde baqılacaq. Bu, büyük masraflarnı ve olarnı temin etmek içün nasıldır menbalarnıñ qıdırılmasını talap etecek. Şimdilik bu meseleler al etilmedi», – dep qayd ete Molohov.
Halqara teşkilâtları Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, oña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevral 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
