2018 senesiniñ yazında «Herson» halqara ava limanı ile Türkiyeniñ «Dalaman» ava limanı arasında uçaq uçuşları başlanacaq. Bunı «Dalaman» ava limanınıñ müdiri Hamdi Güven, Herson vilâyetindeki ava alâqasını taqdim etkende söyledi, dep bildire Herson devlet memuriyetiniñ matbuat hizmeti.
Hamdi Güven, «Dalaman»nıñ Türkiyede büyükligine köre dörtünci ava limanı olğanını qayd etti.
«Herson» ava limanınen muzakerelerimiz çoqtan berli devam etmekte. Biz yalıñız işbirligi yapmaq degil, aynı zamanda öz tecribemizni de paylaşmaq azırmız», – dedi Güven.
Öz nevbetinde «Hersons’ki avialiniyi» kommunal muessiseniñ müdiri Vitaliy Kuçeruk, potensial ava yolu taşıyıcılarınen muzakereler endi başlandı, dep bildirdi.
Herson memurları «kârlı ava yolu taşıyıcılrını» «Herson» ava limanında bedava qonuv ve hizmetlerle celp etmek isteyler.
«Bugün ava limanımızğa (yılda – Q.A.) 25-ke yaqın million hrivna ayırıla. Aynı zamanda biz yalıñız bir yıl içinde 100 biñ yolcunı qabul ettik. Olarnıñ er biri Herson vilâyetinde iç olmadı 500 hrivna qaldırsa, cemisi 50 million yapacaqtır. Bunıñ içün Herson ava limanınıñ paranen temin etilmesi içün Herson ve rayon merkezleriniñ büdjetlerinden daa 25 million aıyrmaq teklif etile. O zaman biletler daa ucuz olacaq, çünki ava yolu şirketi biletniñ fiyatına uçaqlarnı yollav ve qabul etüv ücretlerini qoşa. Biz ise bu masraflarnı Herson vilâyetiniñ büdjetinden qapatacaqmız», – dep tafsilât berdi Herson vilâyeti şurasınıñ yolbaşçısı Vladislav Menger.
«Dalaman» ava limanı Ege deñiziniñ sailinde bulunğan kurortlar ve bu cümleden Marmaris ve Fethiyege hizmet bere. Ondan ğayrı o, Türkiye, Avropa, Afrika ve Orta Şarqtaki 120 istiqametten uçaqlarnı qabul ete.
Alı-azırda «Herson» ava limanından Türkiyege Herson-İstanbul-Herson istiqametinde uçaq qatnay. Daa evel Herson vilâyetiniñ akimiyeti, «Herson» ava limanı Qırım sakinleri içün yarımadanıñ ilhaqından soñ yalıñız Rusiyeden kelgen uçaqlarnı qabul etken «Simferopol» ava limanınıñ yerini tuta bilecek, dep bildirdi.
2014 senesiniñ mart ayında yarımada Rusiye tarafından ilhaq etilgen soñ Qırım ava limanları Ukraina akimiyetiniñ qararınen qapatıldı. Olarğa ve olardan yapılğan er angi uçuş, Ukraina qanunları ve halqara qaideleriniñ bozuluvıdır. Bunı yapqan ava yolu şirketleri Ukraina ve Halqara Sivil Avacılıq Teşkilâtı (ICAO) tarafından halqara sanktsiyalarına oğratıla bileler.
