İşğal altındaki Aqmescitte belediyege bağlı bütün işhane başlıqları işten boşama arizası yazmağa mevbur etildi. Bu aqta Qurumnıñ rusiyeli akimiyetiniñ matbuat hızmeti bildirmekte.
«Belediyeniñ bütün unitar işhaneleriniñ başlıqlarına bir aylıq sınav muddeti berildi. Olar işten boşamanen bağlı şekliy arizalar yazdı ve ayrılğan muddet içinde olar iş semeresini arttırmağan taqdirde, arizalar küçke kirecek», – dep bilidre matbuat hızmeti Aqmescitniñ rusiyeli başlığı İlya Lukaşovnıñ sözlerini.
Noyabrniñ 15-nde Rusiye nezaretindeki Qırımnıñ yolbaşçısı Sergey Aksönov «iş keyfiyeti, tarifler siyaseti ve vatandaşlarğa nisbeten kösterilgen munasebetleri» sebebinden belediyege bağlı unitar işhanelerniñ başlıqlarını işten boşatılmasını teklif etken edi.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey.
