Ukraina informatsion siyaset naziriniñ birinci muavini Emine Ceppar, Rusiye ilhaqtan soñ Qırımda tsivil ealini deñiştirip, arbiy cinayet işley, dep saya.
Bu fikirni o, «112 Ukraina» telekanalınıñ canlı yayında söyledi.
«İşğal vaqtında tsivil ealiniñ deñiştirilmesi, Jeneva konventsiyasını bozğan arbiy cinayettir. Ve Rusiye tamam bu meselede Ukrainağa qarşı daa bir arbiy cinayet işley», – dedi Emine Ceppar.
O, Rusiye tarafından ilhaqtan soñ 2014 senesi sentâbr ayında yarımadada, ülkeniñ akimiyeti tarafından tanılmağan ve ealiniñ bir qısmı ile şu cümleden qırımtatarlarnıñ çoqluğı tarafından boykot etilgen nüfus tahririniñ ötkerilgenini hatırlattı.
«Lâkin bu tahrirge köre, raqamlar şöyledir – Qırımda ukrainlerniñ sayısı 15% ve qırımtatarlarnıñ sayısı10%-ğa qadar tüşti (evelden resmiy malümatqa köre, 13% edi), qalğanlar yani rus tilinde laf etkenlerniñ sayısı ise – 65%», – dep bildire Emine Ceppar.
Bildirgenine köre, resmen 27 biñ Qırımdan köçken şahıs qayd etildi, gayrı-resmiy malümatqa köre ise, olarnıñ sayısı 60 biñdir.
Daa evel Ukraina prezidentiniñ qırımtatar halqınıñ işleri boyunca vekili Mustafa Cemilev, Qırımdaki Rusiye akimiyeti tarafından yarımadağa 250 biñ kişiniñ köçürilgenini bildirdi.
Qırımnıñ ilhaqından soñ Rusiye yarımadada FSB hadimleri ve arbiy qısımlar içün çoq qatlı evler qurıp başladı. Bunıñ kibi qurucılıq işleri yarımadanıñ bir qaç bölgesinde yapıla.
Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti. 2015 senesi oktâbrniñ 7-sinde Ukraina prezidenti Petro Poroşenko munasip qanunnı imzaladı. Halqara teşkilâtları Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, oña «tarihiy adaletniñ tiklenmesi», dey.
