Qırımtatar milliy areketiniñ veteranı Veciye Kaşka bütün qırımtatarlarğa tarihiy vatanı oğrunda canını ayamayıp küreşüvniñ örnegi olaraq belli edi. Bunı Qırım.Aqiqat Radiosınıñ canlı yayınında Qırımtatar Milliy Meclisiniñ reisi Refat Çubarov, noyabrniñ 23-nde 83 yaşlı qadınnıñ ölümini izalar eken, söyledi.
«Bizler içün bu elbette bir şoktır. O, qırımtatar milliy areketiniñ efsanelerinden biridir ve Qırımda halqımız arasında onı bilmegenler yoq edi. O, gençliginden başlap, iç bir kösterişsiz qırımtatarlarnıñ vatanlarına qaytmaları içün ayatını feda etti. Veciye Kaşka, o devirniñ yetekçi dissidentleri olğan Pötr Grigorenko ve Andrey Saharovnen işbirligi yapa ve körüşe edi. Bu kerçekten de büyük ğayıptır», – dedi Meclis yolbaşçısı.
Qırım tarihçısı Gülnara Bekirova Veciye Kaşkanıñ daa sovetler zamanında qırımtatarlarnıñ aqları oğrundaki küreşi aqqında ikâye etti: «1960-ncı yıllarnıñ sonuñda çıqqan sahte aqlav qararına baqmadan, qırımtatarlarnı yarımadada kene de resmen qayd etmeyip, quva ediler. Veciye Kaşkanıñ qorantası 1969 senesinde Qırımğa kelip, ev aldı. Faqat olarnı da, evleri ile mallarını iç bir kompensatsiyasız tutıp alıp, Qırımdan çıqarıp attılar. 1974 senesinde olar kene ev aldı, amma endi başqa köyden. Evlerine sarhoş adamlar basıp kirdi, pencerelerniñ camlarını qırdı ve atta Veciye Kaşkanıñ ağzını qapatacaq olıp, çengesini perttiler. Neticede qoranta Krasnodar bölgesinde yerleşti, lâkin vatanğa qaytmaq teşebbüslerini toqtatmadı», – dep yekünledi tarihçı.
Bir grup qırımtatar faaliyetçileriniñ yaqalanuvı esnasında qırımtatar milliy areketiniñ veteranı Veciye Kaşka yaramay oldı. Adiseniñ yüz köstergen yerinden onı «acele yardım» alıp ketti. Daa soñra qadınnıñ vefat etkeni belli oldı.
Ukrainanıñ qıtadaki qısmında bulunğan Qırım Muhtar Cumhuriyeti Prokuraturası noyabrniñ 23-nde qanunsız tintüvler, yaqalavlar ve qırımtatar milliy areketiniñ veteranı Veciye Kaşkanıñ ölümi vaqiaları boyunca cinaiy işler açtı.
Veciye Kaşka – qırımtatar milliy areketiniñ veteranı. O, 1934 senesinde Aluştağa yaqın yerdeki Üsküt (Privetnoye) köyünde doğdı. 1944 senesinde qırımtatar halqı sürgün etilgen soñ Veciye Kaşka qorantasınen Özbekistanda yaşay edi. 50-nci yıllarda o, ömür arqadaşı Bekirnen beraber qırımtatar milliy areketine qatıldı.
