Link açıqlığı

Timoşenko: «Qırımnıñ işğali esnasında silâlı qarşılıq kösterilmesi Ukrainanıñ zapt etilmesine ketirecek edi»


«Batkivşçyna» fırqasınıñ lideri Yuliya Timoşenko, 2014 senesi Qırımnıñ işğali esnasında Ukraina tarafından silâlı qarşılıq kösterilmesi, bütün Ukraina toprağınıñ zapt etilmesine ketirecek edi, dep saya. Bunı o, Azatlıq Radiosınıñ muhbirine bergen intervyusında söyledi.

«O zamanki vaziyetni hatırlasañız, Herson vilâyetinde endi ücüm başlanayata, Odesa, Harkiv ve Dnipropetrovsk vilâyetlerinde provakatsiyalar başlanğan edi. Qırımda bizim taraftan yapılğan er angi provokatsiya, Ukrainanıñ bütün toprağınıñ öz-özünden başlanğan işğal etilmesine ketirmek mümkün edi», – dedi o.

Millet vekiliniñ fikrine köre, Rusiye tarafından Qırımnıñ işğali başlanğanda Ukrainanıñ milliy telükesizlik ve mudafaa keñeşiniñ (SNBO) yarımadağa ordunı kirsetmemek qararı, doğru qarar edi.

«SNBOnıñ bir ağızdan qabul etilgen qararı doğru edi. Biz eñ azından on biñlerce ukrainlerniñ ayatını ve Ukraina toprağınıñ büyük qısmını qorçaladıq», – dep qayd etti Timoşenko.

Aynı zamanda o, Ukrainanıñ mudafaa naziri, SBU yolbaşçısı ve baş nazir Arseniy Yatsenük tarafından yapılğan çıqışlarnıñ stenogrammasını hatırlattı.

«Olarnıñ çıqışları, Qırımnıñ işğali başlanğanda Ukrainada arbiy areketler yapa bilecek quvetniñ olmağanını köstereler. O vaqıt Tenüh efendi, mudafaa naziri olaraq, arbiy qarşılıq kösterilmesine taba iç olmadı bir adım atılsa, Ukrainada on biñlerce ölüler olıp, Rusiyeniñ ordusı Kyivge kelip çıqacaq, degen edi», – bildirdi Timoşenko.

Deputat, Qırımnıñ işğali vaqtında Ukraina ordusınıñ çaresizliginde qabaatlı olğanlarnı tapmaq içün «bütün prezidentlerniñ işlerini ğayrıdan baqıp çıqıp, emirleri, siyaseti, orduğa alâqalı strategiyaları ve olarğa doğrudan boysunğan mudafaa nazirleriniñ yapqanlarını teşkermek kerek, dey.

Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti. 2015 senesi oktâbrniñ 7-sinde Ukraina prezidenti Petro Poroşenko munasip qanunnı imzaladı. Halqara teşkilâtları Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, oña «tarihiy adaletniñ tiklenmesi», dey.

XS
SM
MD
LG