Link açıqlığı

Rusiye telükesizlik hadimleri, Qırımda yaqalanğan faaliyetçilerniñ evlerinde silâ taptılar dep iddia eteler


Rusiye telükesizlik hadimleri, qırımtatar faaliyetçilerniñ evlerinde yapılğan tintüvler esnasında silâ, narkotikler ve ekstremistik malzemeler taptıldı dep iddia eteler. Bunı, uquqqoruyıcı organlarğa sıltap, «Krıminform» neşiri bildire.

Neşir, telükesizlik hadimleriniñ sözlerini: «Tünevin yaqalanğanlarnıñ evlerindeki tintüvler esnasında bayağı miqdarda patronlar ile üç Kalaşnikov avtomatı tutıp alındı. Avtomatlar közden keçirilgende, olardan «körünmegen» avtomatlar yapmaq istenilgeni belli oldı – olarnı muayyen etmek mümkün olmasın deye zavod nomeralarını silmek istediler» şeklinde ketire.

Rusiyeniñ «RİA Novosti Krım» neşiriniñ malümatına köre, silâdan ğayrı ösümlik asıllı narkotikler ve 60-qa yaqın 7,62 kalibrli patron tapıldı.

Kütleviy haberler vastalarında bildirilgeni kibi, silâ, yaqalanğanlardan biri olğan Asan Çapuhnıñ evinde tapıldı.

Rusiye telükesizlik muessiseleriniñ saytlarında silânen patronlarnıñ tapılması aqqında iç bir malümat yoq.

Noyabrniñ 23-nde kündüz ilhaq etilgen Aqmescitte telükesizlik hadimleri bir grup qırımtatar faaliyetçilerini yaqaladılar. FSB yaqalanğanlarnı, Qırımtatar Milliy Meclisiniñ azaları olaraq kösterdi. Qırımtatar halqınıñ temsiliy organında bu malümat red etildi.

Bir grup qırımtatar faaliyetçileriniñ işbu yaqalanuvı esnasında qırımtatar milliy areketiniñ veteranı Veciye Kaşka yaramay oldı. Adiseniñ yüz köstergen yerinden onı «acele yardım» alıp ketti. Daa soñra qadınnıñ vefat etkeni belli oldı.

Qırımtatar milliy areketiniñ faaliyetçisi Nariman Celâl, bir grup qırımtatar faaliyetçileriniñ yaqalanmasına sebepçi olğan Türkiye vatandaşı, qırımtatar milliy areketiniñ veteranı Veciye Kaşkanıñ qorantasından para hırsızladı, dey.

İşğal etilgen Qırımdaki Rusiye FSBsi, yaqalanğan faaliyetçilerni, Türkiye vatandaşından «hususan büyük miqdarda mal-mülk veya para talap etüv»de qabaatlay.

Al-azırda yaqalanğanlar muvaqqat izolâtorda bulunalar.

Rusiye tarafından yapılğan ilhaqından soñ Qırımda mustaqil jurnalistler, vatandaş faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtınen alâqası bar dep zan etilgen Qırım musulmanlarınıñ evlerinde sıq-sıq tintüvler yapıla.

XS
SM
MD
LG