Link açıqlığı

Saatnıñ esas haberi

Ukrainanıñ aq-uquq qoruyıcıları: Rusiye ilhaq etilgen Qırımda Meclisniñ menfiy suretini yaratmağa tırışa


Rusiye akimiyeti ilhaq etilgen yarımadada telükesizlik küçleriniñ yardımınen Qırımtatar Milliy Meclisiniñ menfiy suretini yaratmağa tırışa. Qırım aq-uquq qoruyıcıları grubunda yarımadada tünevin, noyabrniñ 23-nde ötkerilgen qırırmtatarlarnıñ tintüvleri ve yaqalanuvlarını bu şekilde iza ettiler.

«Noyabrniñ 23-nde Rusiyeniñ FSBsi ve İçki işler nazirligi tarafından Qırımda küçniñ qullanıluvı ile yapılğan areketleri yalıñız qırımtatar halqınıñ vekillerini azatlıqtan marum etüvge ketirmeyip, aynı zamanda facialı neticege – qırımtatar milliy areketiniñ veteranı Veciye Kaşkanıñ ölümine ketirdiler. Rusiye, kontroli altında bulunğan haber resurslarınıñ yardımınen Qırımtatar Milliy Meclisiniñ menfiy suretini yaratmağa tırışıp, bu usulnen onı ekstremist teşkilâtı olaraq tanılmasına yönetilgen özüniñ qanunsız areketlerini aqlaycaq ola», – denile bildirüvde.

Aq-uquq qoruyıcıları halqara cemaatçılığını Rusiye telükesizlik küçleriniñ Qırımdaki areketlerine qarşılıq kösterip, «insan aqlarınıñ qaba bozuluvında ayıplı olğanlarnıñ mesuliyetke çekilmesi içün bütün mümkün olğan areketler»ni yapmağa davet ettiler.

Noyabrniñ 23-nde kündüz ilhaq etilgen Aqmescitte telükesizlik hadimleri bir grup qırımtatar faaliyetçilerini yaqaladılar. FSB yaqalanğanlarnı, Qırımtatar Milliy Meclisiniñ azaları olaraq kösterdi. Qırımtatar halqınıñ temsiliy organında bu malümat red etildi.

Bir grup qırımtatar faaliyetçileriniñ işbu yaqalanuvı esnasında qırımtatar milliy areketiniñ veteranı Veciye Kaşka yaramay oldı. Adiseniñ yüz köstergen yerinden onı «acele yardım» alıp ketti. Daa soñra qadınnıñ vefatı aqqında haberler keldi.

Qırımtatar milliy areketiniñ faaliyetçisi Nariman Celâl, bir grup qırımtatar faaliyetçileriniñ yaqalanmasına sebepçi olğan Türkiye vatandaşı, qırımtatar milliy areketiniñ veteranı Veciye Kaşkanıñ qorantasından para hırsızladı, dey.

İşğal etilgen Qırımdaki FSB idaresi, yaqalanğan faaliyetçilerni, Türkiye vatandaşından «hususan büyük miqdarda mal-mülk veya para talap etüv»de qabaatlay.

Qırımda noyabrniñ 23-nde yapılğan yaqalanuvlar aqqında daa tafsilâtlı malümatnı Qırım.Aqiqat saytındaki materialda oquñız.

Rusiye tarafından yapılğan ilhaqından soñ Qırımda mustaqil jurnalistler, vatandaş faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtınen alâqası bar dep zan etilgen Qırım musulmanlarınıñ evlerinde sıq-sıq tintüvler yapıla.

XS
SM
MD
LG