Link açıqlığı

Qırımda yaqalanğan faaliyetçilerni «E» Merkezinden Muvaqqat izolâtorğa alıp keteler


Rusiye telükesizlik hadimleri noyabrniñ 23-nde yaqalanğan qırımtatar faaliyetçilerni «E» Merkezinden Aqmescitteki Muvaqqat izolâtorğa alıp keteler. Bunı Azatlıq Radiosınıñ muhbiri bildire.

Onıñ aytqanına köre, Kâzim Ametovnı mahkemege qadar 48 saatqa yaqaladılar. Bunıñ içün mahkemeniñ oturışı cumaertesi, noyabrniñ 25-nde ötkerilmek mümkün.

Evinde tintüv yapılğan Eldar Abdullayevni serbest bıraqtılar.

«E» Merkeziniñ hadimleri, tintüvler esnasında faaliyetçilerniñ yanında, içinde ekstremistik çağıruvlar bulunğan veraqalar tapqanlarını bildireler. Operativ hadimler, ellerinde yaqalanğanlardan biriniñ Türkiye vatandaşı Yusuf Aytannen yapqan söyleşüvlerniñ audioqaydı bar, dep iddia eteler.

Noyabrniñ 23-nde kündüz ilhaq etilgen Aqmescitte telükesizlik hadimleri bir grup qırımtatar faaliyetçilerini yaqaladılar. FSB yaqalanğanlarnı, Qırımtatar Milliy Meclisiniñ azaları olaraq kösterdi. Qırımtatar halqınıñ temsiliy organında bu malümat red etildi.

Bir grup qırımtatar faaliyetçileriniñ işbu yaqalanuvı esnasında qırımtatar milliy areketiniñ veteranı Veciye Kaşka yaramay oldı. Adiseniñ yüz köstergen yerinden onı «acele yardım» alıp ketti. Daa soñra qadınnıñ vefatı aqqında haberler keldi.

Qırımtatar milliy areketiniñ faaliyetçisi Nariman Celâl, bir grup qırımtatar faaliyetçileriniñ yaqalanmasına sebepçi olğan Türkiye vatandaşı, qırımtatar milliy areketiniñ veteranı Veciye Kaşkanıñ qorantasından para hırsızladı, dey.

İşğal etilgen Qırımdaki FSB idaresi, yaqalanğan faaliyetçilerni, Türkiye vatandaşından «hususan büyük miqdarda mal-mülk veya para talap etüv»de qabaatlay.

Qırımda noyabrniñ 23-nde yapılğan yaqalanuvlar aqqında daa tafsilâtlı malümatnı Qırım.Aqiqat saytındaki materialda oquñız.

Rusiye tarafından yapılğan ilhaqından soñ Qırımda mustaqil jurnalistler, vatandaş faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtınen alâqası bar dep zan etilgen Qırım musulmanlarınıñ evlerinde sıq-sıq tintüvler yapıla.

XS
SM
MD
LG