Link açıqlığı

Çubarov: FSB Qırımda faaliyetçilerni yaqalav ve Meclisni itibardan tüşürüv boyunca mahsus operatsiyanı keçire


Rusiye Federal telükesizlik hizmeti (FSB) ilhaq etilgen Qırımda milliy areketniñ faaliyetçilerini yaqalamaq ve Qırımtatar Milliy Meclisini itibardan tüşürmek maqsadınen keniş mıqyaslı mahsus operatsiyanı keçire. Bunı noyabrniñ 23-nde Facebookta Qırımtatar Milliy Meclisiniñ reisi Refat Çubarov yazdı.

«Qırımdan kelgen haberlerniñ talili köstere ki, ilhaq etilgen Qırımda Rusiyeniñ FSBsi tarafından, milliy areketniñ faaliyetçilerini yaqalamaq ve Qırımtatar Milliy Meclisini itibardan tüşürmek maqsadınen keniş mıqyaslı mahsus operatsiya keçirile», – dep qayd etti o.

Çubarovnıñ aytqanına köre, bu işte milliy areketi veteranı Veciye Kaşkanıñ qorantasını aldatıp işançını qazanğan Türkiye vatandaşı Yusuf Aytanğa provokator rolü ayırıldı.

Noyabrniñ 23-nde kündüz ilhaq etilgen Aqmescitte Rusiye telükesizlik hadimleri bir grup qırımtatar faaliyetçilerini yaqaladı. FSB yaqalanğanlarnı, Qırımtatar Milliy Meclisiniñ azaları dep tanıttı. Qırımtatar halqınıñ temsiliy organında bu malümat red etildi.

Qırımtatar milliy areketiniñ faaliyetçisi Nariman Celâl, bir grup qırımtatar faaliyetçileriniñ yaqalanmasına sebepçi olğan Türkiye vatandaşı, qırımtatar milliy areketiniñ veteranı Veciye Kaşkanıñ qorantasından para hırsızladı, dep iddia ete.

İşğal etilgen Qırımdaki FSB idaresi, yaqalanğan faaliyetçilerni, Türkiye vatandaşından «hususan büyük miqdarda mal-mülk veya para talap etüv»de qabaatlay.

XS
SM
MD
LG