Link açıqlığı

Celâl: Qırımda yaqalanğan faaliyetçiler Türkiye vatandaşından hırsızlağan paralarınıñ qaytarılmasını talap ete ediler


Qırım, Aqmescit - Aqmescitte Bekir Degermenciniñ yaqalanuvı, 2017, noyabr 23 künü

Noyabrniñ 23-nde bir grup qırımtatar faaliyetçileriniñ yaqalanmasına sebepçi olğan Türkiye vatandaşı, qırımtatar milliy areketiniñ veteranı Veciye Kaşkanıñ parasını hırsızladı.

Qırımtatar milliy areketiniñ faaliyetçisi Nariman Celâl Qırım.Aqiqatqa, faaliyetçiler bu paranı qaytarmağa istey ediler, dep ikâye etti.

«Türkiye vatandaşı Yusuf Aytan, bir dolandırıcıdır. O, belli bir qırımtatar (qırımtatar milliy areketiniñ veteranı Veciye Kaşkanıñ – QA) ailesiniñ işançını qazanıp, ondan büyük miqdarda para hırsızladı. Yaqalanğan faaliyetçiler bu qorantanıñ alını bilip, türkni paralarnı qaytarmaq kerekliginde qandırmağa tırışa ediler. Neticede ya türkniñ özü bu diqqattan qurtulacaq oldı, ya da telükesizlik hadimleri bu faaliyetçilerge tazyıq etmek içün vaziyetten faydalanacaq oldılar», – dedi Celâl.

Bu haberni Azatlıq Radiosı rus hizmetiniñ muhbiri de tasdiqlay.

İşğal etilgen Qırımdaki FSB idaresiniñ iddiasına köre, yaqalanğan faaliyetçiler, Türkiye vatandaşından «hususan büyük miqdarda mal-mülk veya para talap etüv»de qabaatlanalar.

Noyabrniñ 23-nde, kündüz ilhaq etilgen Aqmescitte telükesizlik hadimleri bir grup qırımtatar faaliyetçilerini yaqaladılar. FSB yaqalanğanlarnı, Qırımtatar Milliy Meclisiniñ azaları olaraq tanıttı. Qırımtatar halqınıñ temsiliy organında bu malümat red etildi.

Bir grup qırımtatar faaliyetçileriniñ işbu yaqalanuvı esnasında qırımtatar milliy areketiniñ veteranı Veciye Kaşka yaramay oldı. Adise yüz köstergen yerinden onı «acele yardım» alıp ketti. Daa soñra qadınnıñ vefat etkeni aqqında haberler keldi.

Rusiye telükesizlik hadimleri tarafından açıq menbalarda buña dair izaat berilmedi.

Rusiye tarafından yapılğan ilhaqından soñ Qırımda mustaqil jurnalistler, vatandaş faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtınen alâqası bar deye zan etilgen Qırım musulmanlarınıñ evlerinde sıq-sıq tintüvler yapılmaqta.

XS
SM
MD
LG