Link açıqlığı

Putin Rusiye işhanelerini arbiy mahsullar istisalınıñ arttırılmasına azırlanmağa davet etti


Rusiye, Leningrad vilâyeti - Rusiye prezidenti Vladimir Putin Rusiye ile Beyazrusiyeniñ «Ğarp-2017» arbiy talimleri esnasında Lujskiy poligonında

Rusiye prezidenti Vladimir Putin, mülkiyet şekline baqmadan ülkedeki bütün işhanelerni arbiy mahsullar istisalınıñ arttırılmasına azırlanmağa davet etti. Bunı o, noyabrniñ 22-sinde Rusiye Mudafaa nazirligi, arbiy-sanayı kompleksi, nazirlikler ve bölgelerniñ yolbaşçılarınen keñeşüvi esnasında söyledi.

«İqtisadiyatnıñ kerekli vaqıtta arbiy mahsullar ve hizmetlerniñ kölemini qısqa bir müddet içinde arttıra bilmesi – devlette arbiy telükesizlikniñ temin etilmesi içün eñ emiyetli şartlardan biridir. Buña, mülkiyet şekline baqmadan, bütün strategik ve adiy büyük işhaneler azır olmaq kerekler», – deye iqtibas ete Putinni Kremlniñ matbuat hizmeti.

O, «mobilizatsion (seferberlik) azırlıqnıñ arttırılması içün qoşumça tedbirler»niñ işlep çıqarılmasını buyurdı. Ondan ğayrı o, «istisal küçleriniñ zemaneviyleştirilmesi, maddiy ve tehnik yedeklerniñ teşkil etilmesi ve ordunıñ naqil etilmesi» boyunca keçken yıllar içün esabatnıñ berilmesini talap etti.

Rusiye prezidenti cümleden küzde Rusiye ve Beyazrusiye topraqlarında ötkerilgen «Ğarp-2017» arbiy talimleriniñ neticeleri aqqında esabatnı talap etti. NATOda, bu manevrler Rusiyeniñ «büyük cenkke» azırlanğanını köstereler, denildi.

Rusiye Mudafaa nazirliginiñ bildirgenine köre, «Ğarp-2017» talimlerinde 13 000-ge yaqın kişi iştirak etti. NATOnıñ Baş kâtibi Yens Stoltenberg ise, asker sayısı ile talimler coğrafiyasınıñ Moskva tarafından bildirilgen parametrlerden bayağı büyük olğanını söyledi.

XS
SM
MD
LG