Rusiyeniñ Baş prokuraturası Rusiyeli televizion alıp barıcı Kseniya Sobçaknıñ ilhaq etilgen Qırım aqqındaki sözlerini teşkere. Bunı o, «Eho Moskvı» radiostantsiyasınıñ canlı yayında söyledi, dep yaza Azatlıq Radiosı.
Televizion alıp barıcı bunı prokuraturanıñ resmiy mektübinden ögrengenini bildirdi, dep yaza neşir.
Kseniya Sobçak oktâbrniñ 18-nde prezident saylavında iştirak etmek istegenini resmen bildirdi. O, özüne «er keske qarşı» namzetim, dey. Sobçaknıñ özüni prezident saylavına namzet olaraq kösterüvine ihtimal ile Rusiye prezidenti memuriyetiniñ alâqası olğanı daa evel kütleviy haber vastalarında bildirilgen edi. Televizion alıp barıcı ise Kreml ile alâqasını red ete.
Rusiyede president saylavına namzetini köstermek planları ile paylaşqan Sobçak, ilhaq etilgen Qırımda saylavdan evelki teşviqat kampaniyasınıñ yapılmaycağını söyledi.
O, Rusiye Qırımnı ilhaq etip, halqara mecburiyetlerini bozdı, dep bildirdi.
Ondan ğayrı Kseniya Sobçak ilhaq etilgen Qırımda yarımadanıñ statusına dair «yañı mustaqil referendum»nı ötkermege teklif etti.
Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti. 2015 senesi oktâbrniñ 7-sinde Ukraina prezidenti Petro Poroşenko munasip qanunnı imzaladı. Halqara teşkilâtları Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, oña «tarihiy adaletniñ tiklenmesi», dey.
