Ukraina Tış işleri nazirligi, Rusiye tarafından Qırımda ve Aqyarda yaşağan Ukraina vatandaşlarınıñ askeriy hizmetke çağırıluvı munasebeti ile narazılıq bildire.
Bu malümat noyabrniñ 21-sinde faş etilgen Ukraina Tış işleri nazirliginiñ beyannamesinde bildirile.
«Rusiye Mudafaa nazirliginiñ bildirgenine köre, vaqtınca işğal etilgen Qırım Muhtar Cumhuriyetiniñ 800-den ziyade sakini endi arbiy hizmetni keçüv yerlerine yollanıldı», – denile beyannamede.
Ukraina Tış işleri nazirligi bildirgeni kibi, BMT Baş assambleyası, 2016 senesi dekabrniñ 19-nda qabul etilgen qararında Moskvanı halqara humanitar uquqı boyunca üstüne alğan mecburiyetlerini eda etmege davet etti. Mezkür qararğa köre, işğalci devletke, imayesi altına alğan şahıslarnı silâlı ya da yardımcı quvetlerinde hizmet etmege zorlamaq ve göñülli olaraq ordusına kirmeleri içün tazyıq ya da teşviq etmek yasaqtır.
Ondan ğayrı, Tış işleri nazirliginiñ malümatına köre, 2017 senesi noyabrniñ 14-nde BMT Baş assambleyasınıñ Üçünci komiteti tarafından qabul etilgen Qırımda insan aqlarınıñ vaziyeti aqqında qararında Rusiyege doğrultılğan «cümleden tazyıq ya da teşviqat vastasınen Qırım sakinlerini Rusiyeniñ silâlı ya da yardımcı quvetlerinde hizmet etmege zorlav areketlerini toqtatmaq» daveti bulunmaqtadır.
Qırımnıñ ilhaqından soñ Rusiye akimiyeti Qırım sakinlerini öz ordusınıñ saflarına ala. Yarımadada bir çoq kütleviy tedbirlerde Rusiye Silâlı quvetlerinde hizmet etüv teşviqatı yapıla. Halqara qanunları ve BMT Baş assambleyasınıñ qararlarına baqmadan Qırım sakinleri Rusiye ordusına hizmetke alınalar.
Rusiye mudafaa nazirligi, ilhaq etilgen Qırımnıñ arbiy komissariatı tarafından «Küz-2017» çağırıluvından Rusiye ordusına 103 arbiy hizmetçiniñ yollanılğanını bildirdi.
Rusiye mudafaa muessisesinde, aqımdaki yılnıñ küzü-qışında Qırımdan ve Rusiyeniñ cenübinden 22 biñden ziyade kişi arbiy hizmetke çağırılacağı qayd etile edi.
