Link açıqlığı

Gemeci: qırımtatar faaliyetçisi Bilâlovnı, polis hadimlerine boysunmadı deye qabaatlay bile ediler


Qırım uquqçısı Lilâ Gemeci, qırımtatar faaliyetçisi Alimdar Bilâlov uquqçığa vaqtında muracaat etmegen olsa, onıñ yaqalanması, polis hadimlerine boysunmadı deye cinaiy taqipnen yekünlene bilecek edi, dep iddia ete.

Bu fikirni o, Qırım.Aqiqat Radiosınıñ canlı yayınında «Krımskaya solidarnost’» faaliyetçisi Alimdar Bilâlov aydağan maşinanıñ Rusiye uquqqoruyıcı organlarnıñ hadimleri tarafından toqtatılğanını izalar eken söyledi.

«Biz, Rusiye uquqqoruyıcı organları hadimleriniñ Qırımda öz devletiniñ qanunlarına riayet etilmegenlerini köremiz. Qanunnı delil kösterip bir şeyler isbatlamağa tırışmaq, nafile yerde olğanına qandıq. Bunıñ içün böyle allarğa tüşkende esası – eñ keniş kütlege bildirüv ve uquqçılarnen bağ tutuvdır», – dey Gemeci.

Onıñ aytqanına köre, Rusiye telükesizlik küçleriniñ memurları Qırımda, polis hadimlerine boysunmayuv qabaatlavını «iç bir sebebi olmasa bile sıq-sıq qullanalar». Aytqanına köre, bunı bir kişilik piketler ötkerüv tecribesi kösterdi.

Noyabrniñ 19-nda kündüz Aqmescitte Rusiye telükesizlik küçleriniñ memurları, maşinanı aydap qaçqanını zan etip, Alimdar Bilâlovnı yaqaladılar.

Faaliyetçi, yaqalanğanı «Krımskaya solidarnost’» cemiyet areketiniñ çerçivesinde faaliyet köstergeninen bağlı olğanını tüşüne. Aynı künü onı serbest bıraqtılar. Bilâlov, maşinasınıñ apis etilgenini bildire.

«Krımskaya solidarnost’» birleşmesinde, azalarından biri olğan Bilâlovnıñ yaqalanmasını, «içtimaiy ve siyasiy ceetten faal musulmanlarğa qarşı basqı» dep sayalar.

Uquqçı Gemeciniñ bildirgenine köre, Rusiye telükesizlik küçleriniñ memurlarında noyabrniñ 19-nda yaqalanıp serbest bıraqılğan Bilâlovğa qarşı iç bir şubhe qalmadı.

Rusiye uquqqoruyıcı organlarınıñ hadimleri vaqianı iza etmeyler.

Noyabrniñ 8-nde Eski Qırımda Bilâlovnıñ evinde tintüv yapılğanda ondan üç biñ AQŞ dolları ile 60 biñ Rusiye rublesi (qararnen 24 biñ Ukraina hrivnası – QA) ğayıp oldı.

Qırım Rusiye tarafından ilhaq etilgen soñ FSB yarımadada mustaqil jurnalistler, qırımtatar faaliyetçileri, muhalif ve Ukrainanıñ tarafını tutqan cemaatçılar ve diniy azlıqlarnıñ vekillerini muntazam surette yaqalay, soraştıra ve evlerinde tintüvler yapa. Aq-uquq qoruyıcıları Rusiye telükesizlik küçleriniñ bu areketlerine, siyasiy maqsatlı areketler deyler.

XS
SM
MD
LG