Link açıqlığı

Çubarov: Qırım ve işğal etilgen Donbassnı Rusiye nezaret etkence inqilâp bitken sayılmaz


İlhaq etilgen Qırım ve işğal altındaki Donbassnı Rusiye nezaret etkence inqilâp bitti, dep sayılmaz. Bu aqta Qırımtatar Milliy Meclisiniñ reisi Refat Çubarov Facebookta yazmaqta.

«Rusiyeniñ arbiy tecavuzı, Qırımnıñ vaqtınca işğal etilmesi ve Lugansk ve Donetsk vilâyetleriniñ bazı rayonları kontrolden çıqqan vaqıtta, Ukraina halqından Qırım Muhtar Cumhuriyeti ve Aqyar şeeri de şu cumleden olmaq üzre, tanılğan halqara sıñırlar içerisinde Ukraina devletiniñ topraq bütünligini tiklemesi içün bütün resurs ve küçüniñ mobilizatsiya yapılması talap etile», – dep yaza Çubarov.

Bu arada, Milliy Meclis reberiniñ fikrine köre, tış siyasette elde etilgen körümlü neticelerge nisbeten, iç siyasetteki ciddiy muvafaqiyetsizlikler, cemaatnıñ al-azırdaki akimiyetke qarşı raatsızlığınıñ artmasına sebep ola.

«Mından yañı Maydan başlatılmasınen bağlı sesler yañğırap başlay. Bu maaalde yañı Maydan ğayesi pek telükeli bir adımdır ve Rusiye bu fursatnen faydalanmağa areket eter. Onıñ içün 2014 senesi baar-yaz aylarında ayatqa keçirip olamağan planlarını tekrar sınamaq pek cazibeli olıp körünir», – dep qayd ete Milliy Meclis reberi.

2013 senesi noyabrniñ 21-nde Ukrainada Yevromaydan dep adlandırılğan narazılıq aktsiyaları başlanğan edi. Soñradan bu vaqialar Menlik İnqilâbı dep adlandırıldı.

Ukraina Baş prokuraturasınıñ malümatına köre, Yevromaydan devamında 2000 biñden ziyade insan zararlana, olardan 104 insan elâk ola. Olarnıñ ekseriyeti 2014 senesi fevralde elâk olalar. Narazılq aktsiyalarınıñ qurbanları Kök Yüzü Qaramanları dep anlandırılmaqta.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, onı «tarihiy adaletniñ tiklenmesi» dep adlandıra.

XS
SM
MD
LG