Ukraina Tış işleri nazirligi Beyazrusiyeden Ukraina elçihanesiniñ birinci kâtibi İgor Skvortsov sürülmesine bir cevap olaraq, Kyivdeki Beyazrusiye elçihanesiniñ birinci kâtibini sürgün etti, dep bildire Azatlıq Radiosına Ukraina Tış İşleri nazirliginiñ matbuat kâtibi Maryana Betsa.
Onıñ sözlerine köre, protsedura «ortaqlıq printsipi» esasında yapılmaqta.
«Ukraina muhbiri Pavel Şaraykonen bağlı vaziyet ve Minskniñ Beyazrusiyeden ukrain diplomatını sürgün etmesine istinaden, MİD ortaqlıq printsipi esasında devletimizden Beyazrusiye elçihanesiniñ temsilcisini sürgün etme qararını aldı. O, elçihaneniñ birinci kâtibidir. Al-azırda o işini yekünlep, devletimizni terk etti», – dey Betsa. O, sürgün etilgen diplomatnıñ adını añmay.
Noyabrniñ 20-nde Ukrainanıñ Minskteki elçisi İgor Kizim, Minskniñ Ukraina elçihanesiniñ hadimi İgor Skvotsovnıñ persona non grata ilân etmesinen bağlı qararınen razı olmağanını bildirdi.
Beyazrusiye KGB-si bildirgenine köre, Skvotsovnıñ persona non grata ilân etilip, devletten sürgün etilmesi, Minsk casuslıqta qabaatlağan ukrainalı muhbir Pavel Şaraykonen bağlıdır. KGB’niñ ifadesine köre, «Ukraina Mudafaa nazirligi Baş idaresiniñ hadimi olğan İgor Skvortsov, elçihaneniñ hadimi olaraq areket eterek» Şarayko işini koordine etken eken emiş.
