Noyabrniñ 21-nde işğal altındaki Bağçasarayda yaşağan Mustafa Mustafayevniñ evinde «teşkerüv» ötkerile.
Bu hususta Facebookta «Qırım birdemligi» cemaat teşkilâtı haber etmekte. Bu malümatnı ayrıca, qırımtatar faali Zair Smedlâyev ve Azatlıq Radiosınıñ rus hızmeti muhbiri de tasdıqlamaqta.
«6-ncı mikrorayonda yaşağan qırımtatar faali Mustafayev Mustafanıñ evinde tintüv yapıla», – dep yaza Smedlâyev Facebookta.
Azatlıq Radiosınıñ muhbiri bildirgenine köre, küç idaresi hadimleri «tintüv» maqsadınen Mustafa Mustafayevge degil de, kredit borcu olğan onıñ oğlu Serverge kelgen ekenler.
Muhbirniñ sözlerine köre, küç idaresi hadimleri bilgisayar, vesiqa ve evni közden keçire.
«Anda 40 yaqın insan toplandı. Şimdilik er şey sakin keçe ve er zamanki «tedbirlerge» oşamay», – dep ikâye ete o Qırım.Aqiqatqa.
Rusiye küç idareleri açıq menbalarda bu hususta şimdilik iç bir izaat bermey.
Qırım Rusiye nezaretine keçkenden soñ, FSB yarımadada muntazam surette insanlarnı tutıp ala, tintüvler keçire, mustaqil jurnalist, qırırmtatar faalleri, muallefet ve Ukraina tarafdarı olğan cemaat erbapları ve diniy azınlıqlarnı teşkil etkenlerni sorğulay. Uquq qorçalayıcılar rusiyeli küç hadimleriniñ işbu areketlerini siyasiy ceetke esaslı dep tanıy.
