Rusiye mahkeme memurları tarafından Aqmescit rayonı Bulğanaq (Kolçugino) köyündeki qırımtatar qorantasınıñ evinden çıqarılması qoranta qararını adaletsiz, dep saya. Bu aqta noyabrniñ 20-nde Qırım.Aqiqatqa o evde yaşağan Lenur Seitnebiyev ikâye etti.
«Men bu evni 1993 senesi satın aldım. O vaqıtta ev saibi olğan qadınnen üç biñ dollarğa añlaşqan edik. Men üçte ekisini ödedim, lâkin o alâ daa iç bir vesiqa bermedi. Olarnen mahkemeleştik, amma mahkeme menim delillerimni esapqa almağan edi. 23 yıl devamında men kommunal masraflarnı ödep turdım, şaatlarım da bar ve 18 m2 evni 120 m2 qadar qurıp büyüttim. Ev gaz ve suv keçirdim. Mahkeme bulrnıñ iç birini esapqa almadı. Advokat küreşken olsa daü iç bir şey isbat etip olamadı», – dep ikâye etti Seitnebiyev.
Onıñ sözlerine köreü o ilk mahkemeni qazanğan, lâkin appelâtsiya ve kassatsion mahkemeni qazanıp olamağan.
Rusiye küç idarelerinen evge aqqı olğanını ilân etken şahıs açıq menbalarda bu hususta iç bir izaat bermediler.
Noyabrniñ 20-nde, kündüz, Bulğanaq köyünde bir qorantanıñ evinden çıqarılğanı aqqında belli oldı.
İşğal altındaki Qırımda qomşu Rusiyeniñ uquqqoruma orğanları aynı zamanda yarımadanı terk etken ukrain arbiyleriniñ kvartiralarını da qanunsız şekilde çekip almaqta.
Rusiye Qırımnı ilhaq etken soñ, ukrain arbiyleriniñ ekseriyeti yarımadadan ketmege mecbur qaldı. 2017 senesi iyülniñ 24-ne qadar işğal altındaki Qırım ve Kyivniñ nezareti tışında qalğan Donbasstan 1 mln 580 biñ 646 şahıs ya da 1 million 270 biñ 372 aile köçip kelgendir.
