Aqmescit rayonındaki Bulğanaq (Kolçugino) köyünde Rusiye mahkeme memurları tarafından bir qırımtatar qorantasınıñ evden çıqarılması, «turmuş, iqtisat meseleleri» ile bağlıdır. Bu hususta Qırım.Aqiqatqa qırımtatar faaliyetçisi Zair Smedlâyev ikâye etti.
«Ev saibi tarafından açılğan davası boyunca berilgen mahkeme qararı esasında evden çıqarılalar. Bir taraf öz maliy vadelerini becermedi emiş. Olar anda 15 yıldan berli yaşaylar. Eki taraftan biri, evni satın aluv añlaşması boyunca alğanını dey, ekincisi ise iç bir vesiqanıñ olmağanını ayta», – deye ikâye etti faaliyetçi.
Bunıñnen birlikte Smedlâyev, bu işte siyasiy tesirniñ olğanını qatiyen red etti.
Noyabrniñ 20-sinde, kündüz, Bulğanaq köyünde bir qorantanıñ evden çıqarılğanı aqqanda haber alındı.
Rusiye telükesizlik küçleri açıq menbalarda bu hususta iç bir izaat bermediler.
Qırım Rusiye tarafından ilhaq etilgen soñ FSB yarımadada mustaqil jurnalistler, qırımtatar faaliyetçileri, muhalif ve Ukrainanıñ tarafını tutqan cemaatçılar ve diniy azlıqlarnıñ vekillerini muntazam surette yaqalay, soraştıra ve evlerinde tintüvler yapa. Uquqqoruyıcılar Rusiye telükesizlik küçleriniñ bu areketlerine, siyasiy maqsatlı areketler deyler.
