Qırımtatar Milliy Meclisiniñ reisi Refat Çubarov, dünya tanığan sıñırlar içinde Ukraina topraq bütünligi tiklengen soñ, ilhaqtan soñ Qırımda tiklengen bütün eykeller bir afta içinde yıqılacağı aqqında ayttı.
Bu aqta o, tünevin Rusiye çarı III Aleksandrğa tiklengen eykelniñ açılışına sebebinden qomşu Rusiye prezidenti nevbetteki sefer Qırımnı ziyaret etkenini izaatlağanda noyabrniñ 18-nde Facebookta yazmaqta.
«İşğal altındaki Qırımda nevbetteki rus eykeliniñ açılışı (18.11.2017) prezident saylâvı arfesinde rus halqını bir daa kütük yerine qoyma maqsadınen mahsus Putin içün uydurılğanı açıq-aydın körünip tura», – dep saya Çubarov.
Onıñ sözlerine köre, III Aleksandr eykeliniñ açılış merasiminde, Putinniñ çar aqqında aytqan er bir sözü, Rusiyeniñ şimdiki sakinleri çarnı Putinniñ özünen tıpqı dep körsinler degen mantığınen saylânğan.
Rusiye bu husus boyunca iç bir türlü kütleviy izaat bermey.
Rusiye prezidenti Vladimir Putin noyabrniñ 18-nde Yaltadaki Livadiya sarayı territoriyasında rus çarı III Aleksandr eykeliniñ açılışında iştirak etti.
Abide açılış merasimde yapqan çıqışında Putin «III Aleksandr Rusiyeni sevgeni ve oña inanğanı» aqqında ayttı. Onıñ sözlerine köre, oña eykel açaraq rusiyeliler, imperatornıñ işleri, yeñişleri ve muvafaqiyetlerine ürmet köstermekteler.
Haber etilgenine köre eykel, XIX asırnıñ ekinci yarısında qurulıp, Ekinci Cian cenki yıllarında yıqılğan Kiçik Livadiya sarayı bulunğan yerde yerleştirilgen. III Aleksandr 1894 senesi Kiçik Livadiya sarayındaki çalışma odasında vefat etken.
Bu yıl mart ayında Qırımnıñ rusiyeli akimiyeti eykel yerleştirmek maqsadınen, o yerde çalışıp turğan tennis saalarınen oyun meydançığını yıqqan edi.
Livadiya sarayı Rusiye imperiyasınıñ soñki çarı olğan II Nikolay ve ailesiniñ yazlıq evi edi. 1945 senesi bu yerde Hitlerge qarşı qurulğan koalitsiya azaları Stalin, Rusfeldt, Churchill iştirak etken Yalta konferentsiyası ötkerilgen edi.
1974 senesinden başlap muzey kompleksi ziyaretçiler içün açıla. Livadiya sarayı Ukrainanıñ yedi mucizesi statusını qazanğan edi.
