Link açıqlığı

Trumpqa Ukrainağa silâ içün 47 mln dollar ayırılması tevsiye etilecek – KHV


Donald Trump Poroşenkonen körüşken vaqıtta, 2017 senesi sentâbrniñ 21

ABC News, ABD Tuşqı işler Nazirligini menba olaraq köstererek, ABD prezidenti Donald Trumpqa, Ukrainağa 47 milion dollarlık yüksek teknologiya imaye silâlarınıñ finansirlenüvi ve satışınen bağlı bir tevsiye planı berilecegini bildirmekte.

ABC News bildirgenine köre, planğa binaen Ukrainağa berilecek silâ arasında tanklarğa qarşı qullanılğan «Javelin» sistemalarına da bar eken.

ABD Milliy telükesizlik Şurası (MTŞ) noyabrniñ 17-nde ABCge, müssessiseniñ berecek iç bir «haberi» olmağanını beyan etken. MTŞ bunıñ arfesinde bu afta yardım paketiniñ tanıtuvi içün izin berilmesine qarar bergen, dep bildire ABC.

İşbu meselenen bağlı er angi bir qarar ABD Kongresi ve Trump tarafından tasdıqlanmaq kerek.

Avgust ayında Ukrainanı ziyaret etken ABD Mudafaa naziri Jim Mattis, Kyivege silâ berilmesine şahsen özü qoltutacağı aqqında bildirgen edi. Bu pozitsiya Beyaz saraynıñ evelki memuriyetiniñ pozitsiyasından farq ete, çünki o, silânen teminlev vaziyetniñ qızğınlaştırılmasına bir sebep teşkil eteceginden çekine edi.

Rusiye Ukrainağa bağlı Qırımnı 2014 senesi ilhaq etken edi. 2014 senesi aprel ayından berli Donbassnıñ bir qısmında arbiy çatışma devam ete. Ukraina ve Ğarp Rusiyeni separatistlerge qol tutmasında qabaatlay. Moskva bunı inkâr ete.

BMT (OON) bergen soñki malümatqa köre, arbiy çatışma neticesinde Donbassta 10 biñ insan elâk olğanı belli.

XS
SM
MD
LG