Noyabrniñ 18-nde Qırımnıñ rusiyeli prokuraturası qırımtatar falli Abdullah Yakubovğa tenbiyelev kâğıtı taqdim etti. Avvokat Emil Kurbedinov haber etkenine köre, faal kütleviy tedbirler keçirüvnen bağlı qanunnı bozmaması boyunca tenbiyelene.
«Tenbiyelev kâğıtı, namusnen çalışmağa, özü yaşağan şeerni kötermege istegen ve namuslı temiz biznes içün küreşken insanğa berile! Abdullah yerli cemaat faali. Sizler onıñ tintüv ve tutıp alınğan insanlar, mahkeme ve piketlernen bağlı pek çoq video-strimlerini körgen olmañız mümkün», – dep yaza Kurbedinov.
Qırım prokuraturasınıñ saytında faalge taqdim etilgen tenbiyelev kâğıtı aqqında iç bir malümat yoq.
Rusiye Qırımnı ilhaq etken soñ, FSB yarımadada muntazam surette insanlarnı tutıp ala, tintüvler keçire, mustaqil jurnalist, qırırmtatar faalleri, muallefet ve Ukraina tarafdarı olğan cemaat erbapları ve diniy azınlıqlarnı teşkil etkenlerni sorğulay. Uquq qorçalayıcılar rusiyeli küç hadimleriniñ işbu areketlerini siyasiy ceetke esaslı dep tanıy.
Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, onı «tarihiy adaletniñ tiklenmesi» dep adlandıra.
