«TASS», Livadiya sarayı müzeyiniñ müdiri Larisa Dekuşevağa sıltap, noyabrniñ 18-nde ilhaq etilgen Yaltadaki Livadiya sarayınıñ parkında Rusiye imperatorı III Aleksandrnıñ eykeli açılacaq, dep bildire.
«Eykelniñ açıluvı, Qırım içün olğanı kibi, bütün Rusiye içün de pek manalı bir adisedir. Bu em rusiyeliler, em de Qırımnıñ çetel musafirlerine III Aleksandrnıñ Rusiye devletiniñ tarihına qoşqan qıymeti kesilmez derecede büyük issesini añlamağa yardım etecek», – dedi Dekuşeva.
Qırım kütleviy haberler vastaları (KHV) bundan evel bildirgenleri kibi, Livadiyada üç metrli III Aleksandr eykeli leyhasınıñ müellifi, Rusiye Ressamlar birligi reisi Andrey Kovalçuktır.
Bu yılnıñ mart ayında Qırım akimiyeti, imperatorğa eykel tiklemek maqsadınen qullanılmaqta olğan tennis meydançıqlarını alıp taşladılar.
Umumrusiye imperatorı, soñki rus çarı II Nikolaynıñ babası III Aleksandr 1894 senesi noyabrinde Yunanistanğa tedaviy içün keter eken Livadiyada öldi.
Livadiya sarayı Rusiye imperatorlığınıñ soñki çarı II Nikolay ve onıñ qorantası içün yazlıq rezidentsiya edi. 1945 senesinde bu yerde Stalin, Ruzvelt ve Çerçilniñ iştirakinen Yalta konferentsiyası deye bilingen Hitlerge qarşı koalitsiyanıñ körüşüvi ötkerildi.
1974 senesinden başlap muzey kompleksi ziyaretçiler içün açıldı. Livadiya sarayına Ukrainanıñ yedi mucizesinden biri statusı berilgen edi.
