Link açıqlığı

Ukrain tilinde tasil alğan Qırım sakinleriniñ sayısı 35 qat eksildi – Ukraina Tış İşleri Nazirligi


Ukraina Tış İşleri Nazirligi (TİN), Venada halqara teşkilâtları yanında Ukrainanıñ Daimiy temsilciliginiñ reisi İgor Prokopçukqa sıltav etip, Rusiye tarafından işğal etilgen Qırımda ukrain tilinde tasil alğan gençlerniñ sayısı 35 qat eksildi, dep bildire.

Tünevin OSCE (OBSE) Daimiy şurasınıñ nevbetteki meclisinde İgor Prokopçuk: «Rusiye işğalcı akimiyeti Qırımda ukrain kimligi, tasili ve medeniyetiniñ er bir körünişini tübü-tamırnen yoq etmege devam ete. Şu cümleden 2013 ile 2017 yılları arasında ukrain tilinde tasil alğan gençlerniñ sayısında büyük eksilüv oldı – 13 biñden 370-ke qadar, ukrain mektepleriniñ sayısı yediden birge, sınıflarnıñ ise 875-ten 28-gece eksildi. Aliy oquv yurtlarında bir oqutuv tili olaraq ukrain tili tekmil ğayıp etildi», – dedi.

Diplomat, böyle sıñırlamalarnıñ BMT Halqara mahkemesiniñ qararına zıt kelgenini bildirdi. Bu qararğa binaen Rusiye «ukrain tilinde tasil alınmasına irişüv»ni temin etmek kerek.

«Vaziyetniñ bu telükeli ve devam etken bozuluvı, münasip qarşılıq ve işğal etilgen Qırımda qırımtatar halqı ile ukrain ve diger etnik gruplarnıñ aqlarına sayğı kösterilmesini temin etmek maqsadınen milliy azlıqlarnıñ işleri boyunca OSCE Yuqarı komissarınıñ daimiy ve faal surette celp etilmesini talap ete», – dedi Prokopçuk.

Noyabrniñ 14-nde BMT Baş assambleyası 72-nci sessiyasınıñ Üçünci (içtimaiy, insaniy ve medeniy meseleri boyunca) komiteti «Qırım Muhtar Cumhuriyeti ve Aqyar şeerinde (Ukraina) insan aqları saasında vaziyet» adlı qararnıñ leyhasını tasdiqladı. TİNde bildirgenleri kibi, Baş assambleyanıñ (BA) teklif etilgen qararı, «işğal etken devlet olaraq Rusiyeni insan aqları ve esas urriyetlerniñ bozulmasını toqtatmağa mecbur etmek» maqsatlıdır. Qarar leyhasınıñ baqılması 2017 senesi dekabrniñ ekinci yarısında BMT BAnıñ plenar meclisinde yapılacağı beklenilmekte.

XS
SM
MD
LG