Kezlev plâjlarınıñ birinde, tahminen balağa ait olğan qadimiy defin tapılğan. Bu aqta noyabrniñ 17-nde şeeerniñ rusiyeli memuriyetiniñ matbuat hızmeti bildirmekte.
O yerden keçken insannıñ biri şeerniñ merkeziy plâjlarından birinde büyük taş lehvasınıñ köşesini körip qala. O, tapqan şeyinen meraqlanıp, bu aqta Kezlev ülkeşınaslıq muzeyine haber ete. Hadimler 1m 20 cm uzunlığında olğan qutunı tetqiq eteler denilmekte haberde.
Matbuat hızmeti bildirgenine köre, mütehassıslarnıñ fikrine binaen, defin zemaneviy Kezlevniñ yerinde yerleşken ve milâttan evel VI asırdaki qadimiy yunan şeeri olğan Kerkinitidağa ait.
Malümatqa köre, buña beñzegen tapılmalar Kezlevde, keçken asırnıñ 70-nci yıllarında tapılğan eken. O zaman, «Teatralnoye» (al-azırda «Kolizey») kafesi qurulğan vaqıtta, eki dane taş qapaqlı mezarlıq tapılğan.
