Link açıqlığı

Saatnıñ esas haberi

Milliy Meclis azası Riza Şevkiyev babasınıñ Qırımda keçken cenazesine Rusiye küç idareleri tarafından taqip etilgeni içün barıp olamay


Qırımtatar Milliy Meclisiniñ azası Riza Şevkiyev Rusiye prokuraturaları tarafından qozğatılğan cinaiy işler sebebinden işğal altındaki Qırımda keçken babası Fevzi Şevkiyevniñ cenazesinebarıp olamay. Bu aqta o Facebookta yaza.

«Bügün babamnıñ cenazesi mensiz keçecek. Federal Qanunnıñ 114 maddesini bozmağa mümkün olmağanı mucibi «Ekstremizm areketlerine qarşılıq kösterüv» aqqındaki ilk resmiy tenbiyelevni maña, Qırım prokurorı vazifesinde vaqtınca icra etken Poklonskaya N. 19.04.2014 senesi, Şmidta, 21 adresinde yerleşken «Qırım» fondınıñ binası üzerindeki Ukraina bayrağı asılğanı içün taqdim etken edi.

Şevkiyev bildirgenine köre, Qırımda oña qarşı uydurılğan ve alâ daa devam etken davalar boyunca onlarnen mahkeme toplaşuvi ötkerilgen.

Milliy Meclis azası o yıl fevralniñ 27-nde icra memurından «Qırım» fonduna kesilgen 4,5 mln rublelik (2 million grivnağa yaqın – QA) cöremenen bağlı olaraq cinaiy iş qozğatılıp, artından eki yıl azatlıqtan marum etilme ihtimali olacağı aqqında tenbiyelev ala.

Fevzi Şevkiyev 92 yaşına kelip vefat etti. O, 1926 senesi Qırım Muhtar SSC Bağçasaray rayonınıñ Stilâ köyünde dünyağa kelgen.

1927 senesi, Fevzi 11 yaşında olğanında, onıñ babası Osman Şevkii SSCB NKVD’si organları tarafından tutulıp alınaraq, özüniñ «inqilâpqa qarşı» yürsetken faaliyeti içün qurşun cezasına mahküm etile, anası Emine Şevki ise, kiçik yaştaki dört balanen beraber qala.

1944 senesi mayısnıñ 18-nde Şevkiyevlerniñ ailesi Qırımdan Özbekistanğa sürgün etile. Fevzi Şevkiyev kiçik oğlunıñ qorantasınen beraber 1990 senesi Qırımğa avdet ete. O, qırımtatar milliy areketiniñ faal iştirakçisi olğan edi.

XS
SM
MD
LG