Link açıqlığı

Saatnıñ esas haberi

Qırımda qırımtatar Milliy Meclisiniñ azası Riza Şevkiyevniñ babası vefat etti


İşğal altındaki Qırımda qırımtatar Milliy Meclisiniñ azası, «Qırım» hayriye fondınıñ yolbaşçısı Riza Şevkiyevniñ 92 yaşındaki babası Fevzi Şevkiyev vefat etti. Facebookta bu aqta qırımtatar faali Zair Smedlâyev haber etmekte.

Onıñ sözlerine köre, cenaze noyabrniñ 17-si, Cuma künü saat 14:00-de Maryinoda (Aqmescitniñ etrafında –QA) Merkeziy, 53 adresinde keçecek.

Qırımtatar halqı Milliy Meclisiniñ reisi Refat Çubarov Qırım.Aqiqatqa, Riza Şevkiyevniñ, babasınıñ cenazesi içün Qırımğa barması telükeli olğanı aqqında ikâye etti.

«İşğalciler açıq olaraq yasaq ilân etmegen ediler. Ancaq, Riza Şevkiyev baş müdiri olğan «Qırım» fonduna nşsbeten cinaiy iş qozğatılğanı belli. Onıñ içün, tutulma ihtimali pek yüksek», – dedi Çubarov.

Fevzi Şevkiyev 1926 senesi Qırım Muhtar SSC Bağçasaray rayonınıñ Stilâ köyünde dünyağa kele.

1927 senesi, Fevzi 11 yaşında olğanında, onıñ babası Osman Şevkii SSCB NKVD’si organları tarafından tutulıp alınaraq, özüniñ «inqilâpqa qarşı» yürsetken faaliyeti içün qurşun cezasına mahküm etile, anası Emine Şevki ise, kiçik yaştaki dört balanen beraber qala.

1944 senesi mayısnıñ 18-nde Şevkiyevlerniñ ailesi Qırımdan Özbekistanğa sürgün etile. Fevzi Şevkiyev kiçik oğlunıñ qorantasınen beraber 1990 senesi Qırımğa avdet ete. O, qırımtatar milliy areketiniñ faal iştirakçisi olğan edi.

XS
SM
MD
LG