Qırım noqtai-nazarı Donbassnıñ reintegratsiyası aqqında qanunğa Minsk añlaşmasınıñ yerini tutmaq içün kirsetilmedi, dep saya Ukrainanıñ halq deputatı Svitlana Zalişçuk. Bu fikirni o, Qırım.Aqiqat Radiosınıñ canlı yayınında söyledi.
«Minsk añlaşmaları, yerlerine Qırımnı qoymaq içün qanun leyhasından alıp taşlandı, demek yañlıştır. Qırım da, Donbass da aynı şekilde silâlı istilâ neticesinde işğal etilgen sayılalar. İleride qabul etilecek qanunğa Minsk añlaşmalarını kirsetmeyip, biz özümizge manevr içün yer qaldıramız. Bugün qarşı taraf ameliyatta bu añlaşmalarnı blok etip, üç yıl devamında eda etmey. Ukraina bu çatışmanıñ çezilüvinde serbest olmaq ve Qırım ile Donbasstaki vaqialarğa öz körüşini saqlamaq kerek», – dep qayd etti parlament azası.
Noyabrniñ 15-nde Yuqarı Radanıñ milliy telükesizlik ve mudafaa meseleleri boyunca komitetiniñ meclisinde Donbassnıñ reintegratsiyası aqqına qanun leyhasına Qırımnıñ Rusiye tarafından ilhaqı aqqında tüzetüvler kirsetildi. Bu aqta Petro Poroşenko Blokundan halq deputatı İvan Vinnyk ikâye etti. Onuñ aytqanına köre, tıpqı Yuqarı Radasınıñ qararında ve Ukrainanıñ halqara mahkemelerinde açqan davalarında olğanı kibi, yarımadanıñ ilhaq etilüvi 2014 senesi fevral 20-sinde başlandı dep tayin etildi.
