Link açıqlığı

Qırımtatar faali olğan Smedlâyev internet vastasınen qorqutılğanı aqqında ikâye ete


Zair Smedlâyev

Qırımtatar faali olğan Zair Smedlâyev, noyabrniñ 16-nda Qarasuv rayonı Qışlav (Kurskoye) köyüniñ sakini olğan qırımtatarınıñ evi qurşunğa tutulğanını yazğanından soñ, ictimaiy ağlar vastasınen qorqutılğanı aqqında ikâye etip berdi.

«Bu «mından coyulıñız, yoqsa bizler sizlerni... felân-tügen yaparmız» ve sögünç tarzında aytılğan nevbetteki qorquzuv. Menimce olar, Qırımdan asla ve bizler bulunğan kerçek vaziyet aqqında malümat ketkenini istemeyler. Meni parağa satılğan birisi, dep kösterecek olalar. Yaqında qayd etilgen, bir kazak fotoresimi ve eki-üç dane Rusiye tarafdarı olğanını köstergen paylâşuvı mevcut bir qullanıcıdan keldi», – dep ikâye ete Smedlâyev Qırım.Aqiqatqa.

O, böyle qorquzuvlar «sıq-sıq kelgenini» qayd etti.

Noyabrniñ 16-sında kündüz künü, Smedlâyev Facebookta Qarasuv rayonı Qışlav (Kurskoye) köyüniñ sakini Cafer Ametovnıñ evi qurşunğa tutulğanını aydınlatıp, KHV içün izaatlar berip turğan edi.

Rusiye Qırımnı ilhaq etken soñ, FSB yarımadada muntazam surette insanlarnı tutıp ala, tintüvler keçire, mustaqil jurnalist, qırırmtatar faalleri, muallefet ve Ukraina tarafdarı olğan cemaat erbapları ve diniy azınlıqlarnı teşkil etkenlerni sorğulay. Uquq qorçalayıcılar rusiyeli küç hadimleriniñ işbu areketlerini siyasiy ceetke esaslı dep tanıy.

Ukraina Yuqarı Radası Rusiye tarafından Qırımnıñ vaqtınca işğaliniñ resmiy başlanğıç kününi 2014 senesi fevral ayınıñ 20-si olaraq qabul etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, onı «tarihiy adaletniñ tiklenmesi» dep adlandıra.

XS
SM
MD
LG