Ukraina tışqı işleri Nazirligi, işğal altındaki Qırımnıñ İçki rayonı Eseniñki (Puşkino) köyünde yaşağan qırımtatar tili ocası Lenara Mustafayevanıñ evinde tintüv keçirilgeni sebebinden Rusiyege narazılıq bildirdi.
Bu aqta noyabrniñ 16-nda Ukraina MİD’iniñ spikeri Maryana Betsa Twitterde yazmaqta.
«İşğalci qırımtatarlarına nisbeten basqını ep arttırmaqta. Mecburiy sürgün içün «esas» azırlay. Rusiye Federatsiyasına nevbetteki narazılığımıznı bildiremiz», – dep yaza Betsa.
Qırımtatar Milliy Meslisiniñ reisi Refat Çubarov noyabrniñ 16-sı, cumaaqşamı künü, Qırımnıñ İçki rayonında yaşağan qırımtatar tili ocası Lenara Mustafayevanıñ evinde tintüv yapılğanı aqqında bildirgen edi.
«Qırım birdemligi» cemaat birleşmesiniñ faalleri qırımtatar tili ocasınıñ evinde tintüv yapılğan soñ, qocası - Mustafa Mustafayevni, Aqyarğa alıp ketkenleri aqqında haber etken edi.
Şaatnıñ bildirgenine köre, noyabrniñ 16-nda Eseniñki (Puşkino) köyünde eki dane tintüv yapılğan eken.
Rusiye küç idaresi bu hususnen bağlı daa iç bir kütleviy izaat bermedi.
Rusiye Qırımnı ilhaq etken soñ, FSB yarımadada muntazam surette insanlarnı tutıp ala, tintüvler keçire, mustaqil jurnalist, qırırmtatar faalleri, muallefet ve Ukraina tarafdarı olğan cemaat erbapları ve diniy azınlıqlarnı teşkil etkenlerni sorğulay. Uquq qorçalayıcılar rusiyeli küç hadimleriniñ işbu areketlerini siyasiy ceetke esaslı dep tanıy.
