«Qırım birdemligi» cemaat birleşmesiniñ faalleri qırımtatar tili ocası Lenara Mustafayevanıñ evinde tintüv yapılğan soñ, ilhaq etilgen Qırımnıñ İçki rayonı Eseniñki (Puşkino) köyü sakininiñ tutulıp alınğanı aqqında haber etmekte.
Bu aqta birleşmeniñ Facebooktaki saifesinde bildirmekte.
Vaqianıñ şaatı olğan Ridvan Memetovnıñ malümatına köre, küç idaresiniñ hadimleri ocapçeniñ qocası - Mustafa Mustafayevni, Aqyarğa alıp ketken.
Memetov ayrıca, Lenara Mustafayeva tintüv ve qocasını alıp ketkenlerinden soñ, yaramağanını da bildirmekte.
Memetov Facebookta derc etken videosında, küç idaresiniñ hadimleri «politsiya hadimini aqaretlengenleri içün Mustafayev 15 künge apiske atılabilecegi» aqqında aytılğanı eşitile.
Şaatnıñ bildirgenine köre, noyabrniñ 16-nda Eseniñki (Puşkino) köyünde eki dane tintüv yapılğan eken.
Rusiye küç idaresi bu hususnen bağlı daa iç bir kütleviy izaat bermedi.
Qırımtatar Milliy Meslisiniñ reisi Refat Çubarov noyabrniñ 16-sı, cumaaqşamı künü, Qırımnıñ İçki rayonında yaşağan qırımtatar tili ocası Lenara Mustafayevanıñ evinde tintüv yapılğanı aqqında bildirgen edi.
Rusiye Qırımnı ilhaq etken soñ, FSB yarımadada muntazam surette insanlarnı tutıp ala, tintüvler keçire, mustaqil jurnalist, qırırmtatar faalleri, muallefet ve Ukraina tarafdarı olğan cemaat erbapları ve diniy azınlıqlarnı teşkil etkenlerni sorğulay. Uquq qorçalayıcılar rusiyeli küç hadimleriniñ işbu areketlerini siyasiy ceetke esaslı dep tanıy.
